Komunat arbëreshe në Itali do të kenë tashmë si organ drejtues komunën e Frascinetos, e cila është po ashtu shtëpi e këtij minoriteti.
Memorandumi është miratuar nga këshilli komunal i Frascinetos, me në krye kryetarin e bashkisë Angelo Catapano, dhe nga komunat arbëreshe Acquaformosa, Civita, Lungro, Plataci, San Basile, San Constantino Albanese dhe San Paolo Albanese.
Frascineto do të shërbejë për nevojën për të ruajtur trashëgiminë e pasur shpirtërore, historike, kulturore dhe mjedisore të arbëreshëve.
Kryetari i bashkisë së Frascinetos, Angelo Catapano u shpreh se protokolli i marrëveshjes ka si qëllim forcimin e administratave lokale, në mënyrë që të krijojë mbi të gjitha një sistem për ruajtjen dhe forcimin e trashëgimisë specifike etnike-gjuhësore
Ai i bëri thirrje për përfshirje të gjitha komunave arbëreshe që duan të jenë pjesë, pavarësisht vendndodhjes së tyre territoriale.
Arbëreshët u vendosën në Itali në shekujt e XV dhe XVI, pas vdekjes së heroit kombëtar shqiptar Gjergj Kastrioti Skënderbeu, pushtimit gradual të Shqipërisë dhe të gjithë Perandorisë Bizantine nga turqit osmanë.
Njihen shtatë eksode të mëdha që nisin që pas vdekjes së Gjergj Kastriotit, deri nga fundi i shek XVIII.
Ngulimet e fundit të arbëreshëve janë në Italinë qendrore-veriore, si në provincën e Pavias dhe të Piaçencës, po ashtu një grup i madh iu drejtua rajonit qendror të Abrucos. Sot, Italia ka mbi 260.000 njerëz që flasin gjuhën arbërore.
