Revista e mirënjohur e udhëtimeve “Conde Nast” i ka dedikuar një shkrim qytetit të Tiranës, për të cilin shkruan se “është një nga  kryeqytetet më ekzotike dhe tërheqëse europiane”. Cristina Fernandez Gonzalez gazetare e botimit spanjoll të revistës ka vizituar kryqyetetin shqiptar për plot 48 orë për ta zbuluar pak e nga pak thelbin e vërtetë të tij.

“Tirana ka diçka që të fut në kurth. Kjo ju befason dhe ju fton ta ”zhvishni” atë dalëngadalë deri sa të zbuloni se cili është thelbi i saj i vërtetë. Dhe ne jemi të gatshëm ta ”zhveshim”. Për 48 orë, jo më pak. Tirana është rishfaqur fuqishëm pas dekadave vuajtje nga diktatura paranojake e Enver Hoxhës. Ajo që e la Shqipërinë plotësisht të izoluar nga bota dhe që, në një farë mënyre, i jep asaj këtë rol misterioz, atë të thesarit për ta zbuluar, që sot na pëshpërit në vesh  këngë sirenash” shkruan Gonzales.

Për gazetaren spanjolle, Tirana është një qytet që më shumë ndihet sesa duket.

“Një qytet që na kërkon fort që ne ta ”gërvishtim” thellë nga brenda. Dhe për ta bërë këtë, asgjë nuk vlen më shumë sesa të vizitosh një nga mijëra bunkerët që Hoxha urdhëroi të ndërtonte në të gjithë vendin, e gjithë kjo nga frika e tij e jashtëzakonshme nga një sulm bërthamor nga armiqtë e tij.”- thuhet ndër të tjera në artikulll.

Gonzales shkruan se Tirana po ndryshon me hapa të mëdhenj për të kapur kohën e humbur, por pa hequr dorë nga e kaluara e saj, për të kuptuar të sotmen.

Artikulli i fton qytetarët spanjollë që të nxitojnë ta njohin këtë vend të vogël, ku do të kenë në dispozicion edhe një ciceron, shërbim i cili mund të merret në Zyrën e Turizmit pranë sheshit “Skënderbej”, ku gjithashtu mund të gjenden edhe itinerare të cilat lidhen me arkitekturën komuniste, historinë dhe tema të tjera, përfshirë edhe një mori fasadash nga më befasueset, të cilat rrethojnë qendrën historike të Tiranës.

Gazetarja sygjeron turistët që të vizitojnë 289 hektarët e Parkut të Madh që janë ideale për të ecur, për të bërë sport, për të peshkuar në liqenin artificial ose për të pushuar, i shtrirë në bar pas një dite të lodhshme.