Cikli i takimeve “Mirëmëngjes Diasporë” u zhvillua ditën e sotme më ambientet e universiteti Polis, ku sipërmarrës, studentë dhe përfaqësues të arsimit diskutuan mbi vështirësitë dhe problemet që hasin në tregun e punës sot në Shqipëri si mungesa e punonjësve të kualifikuar, certifikimi, humbja e stafit, largimi i profesionistëve etj. Ndaj edhe qëllimi i këtij takimi të radhës ishte vendosja e urave të bashkëpunimit midis biznesit dhe arsimit, për të krijuar një ambient pune të përshtatshëm i cili të ketë mundësi të ndalojë Brain Drain me të cilin po përballet Shqipëria.
E pranishme në Mirëmëngjes Diasporë zv. Minsitrja për Evropën dhe Punët e Jashtme Artemis Malo tha se qasja e saj ndaj kësaj problematike nuk është vetëm politike.
“Sot nuk jam vetëm si politikane këtu, por edhe si pedagoge. Duke i pare problemet nga një këndvështrim tjetër dua t’ju përgëzoi për iniciativa të tilla por sidomos për feed back-un që marrim çdo vit nga ky universitet” tha ajo.
Duke vlerësuar punën e deritanishme të Dhomës së Biznesit të Diasporës Shqiptare, znj. Malo shtoi se e vlerëson shumë faktin që në krye të Dhomës së Biznesit është sipërmarrësi Lazim Destani. “Jam mirënjohës që sot kemi një strukturë dinjitoze dhe me integritet me të cilën mund të bashkëpunojmë të sigurt përfundoi Malo.
I pranishëm në takim Presidenti i Nderit të Dhomës së Biznesit të Diasporës z. Lazim Destani tha se këto takime shërbejnë për të lidhur biznesin me arsimin. “Nuk duhet të lejojmë që të na e kalojë koha, por duhet të shkojmë përpara, të përgatitemi për sfidat që mund të na sjellë e ardhmja” tha ai.
Ndërsa Kryetari i Dhomës së Biznesit z. Ardian Lekaj u ndal tek fenomeni në rritje i Brain Gain. “Ne si sipërmarrës kudo që jemi duhet patjetër që eksperiencën tonë ta sjellim në Shqipëri Sot Brain Gain është problematika. Se bashku duhet të bëjmë të mundur që të rinjtë shqiptarë të shohin dritë në fund të tunelit. Duke vënë ne dispozicion të njëri-tjetrit kapacitete tona, Dhoma e Biznesit të Diasporës së bashku me Universitetin Polis, duhet dhe do të krijojmë një mundësi për të rinjtë në të ardhmen”, tha ai.
Ndërsa rektori i Universitetit z.Besnik Aliaj duke ritheksuar partneritetin biznes arsim solli shembullin e shkollës franceze të sipërmarrjes.
“Pas një bashkëpunimi më shumë se 10 vjeçar me shkollën prestigjioze franceze të sipërmarrjes, e cila është shumë interesante për faktin se është një krijesë e Dhomave të Biznesit dhe Tregtisë franceze. Kjo shkolë na ka ndihmuar shumë që të kuptojmë se si sipërmarrja dhe biznesi mund të lidhen me arsimin dhe me natyrën e shkollës sonë. Nisur nga kjo ne krijuam edhe shkollën e biznesit në Polis. Të cilën nuk dëshirojmë që kjo shkollë të mos mbetet e thatë, të mos jetë e shkëputur nga shoqëria. Dhe për këtë ne kemi nisur një bashkëpunim me aktorë të ndryshëm në shoqëri e në mënyrë të veçantë me Dhomën e Biznesit të Diasporës Shqiptare”, tha ai.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
