Vota e Diasporës në zgjedhjet e 25 prillit është ende në proces diskutimi nga ana e Komisionit Qendror të Zgjedhjeve, por për ekspertin Kristaq Kume në këto kushte KQZ nuk ka pse kërkon mendimin politik, pasi ata e kanë dhënë me miratimin e kodit.
“Nuk ka asnjë arsye që të shtrohet pyetja pasi është thënë se nëse do të bëhet votimi i shtetasve jashtë territorit të vendit është detyrim ligjor për tu realizuar si i tillë dhe ky detyrim ligjor nuk varet fare nga fakti se zbatohet apo jo, në qoftë se kemi 2, 1, 200 apo 200 mijë zgjedhës jashtë territorit të vendit që kërkojnë të votojnë pa qenë e nevojshme që të vijnë në Shqipëri.
Për këtë gjë partitë politike, forcat politike, mazhorancë dhe opozitë kanë rënë dakort me kohë dhe dakortësia e tyre ishte e tillë që pasi e zgjidhën ranë dakort në parim për ta realizuar votimin nga jashtë territorit të vendit kanë ngarkuar KQZ që të hartojë të gjithë kuadrin nënligjor në të cilin do të përcaktohen procedurat që duhen ndjekur për ta realizuar një votim të tillë.
Mendoj se në këto kushte Komisioneri Shtetëror dhe Rregullatori nuk ka pse të kërkoj dhe të pyesi dhe të ju marri mendimin partive politike se, si dhe pse duhet ta bëjnë dhe a duhet apo jo ta bëjnë një gjë të tillë. Partitë politike e kanë mbyllur një gjë të tillë”, thotë ai për Fax News.
Sipas ekspertit Kume, vota e Diasporës duhet të bëhet përmes postës, pra me fletë votimi, por problemi është kush do e realizojë këtë shërbim postar. Ai hedh idenë e një agjencie ndërkombëtare të shërbimit postar, duke shmangur kështu edhe interpretime për kompromentim të votës.
“Kjo duhet të bëhet nëpërmjet postës, pra me fletë votimi. Problem është se kush do të jetë ai që do ta realizojë këtë shërbim postar, Posta e Shqipërisë apo ndonjë agjent tjetër. Këtu ka shumë rëndësi që të merret një vendim i cili të plotësojë kërkesën që është e shkruajtur në Kodin e Praktikave të mira për çështjet zgjedhore të Komisionit të Venecias në të cilin thuhet se agjenti që do të realizojë procedurën për votim, posta ose dikush tjetër duhet të ketë besimin e plotë të palëve për shërbimin që ai kryen”, u shpreh Kume.
