Hekurudha Vorë-Hani i Hotit do të përfaqësojë një çlirim të vërtetë të kostove për qytetarët tanë, pasi konsumi i karburantit të makinave të tyre për t’u zhvendosur është sot katërfish më i lartë!
Pak ditë më parë, qeveria jonë nënshkroi marrëveshjen e kthyer në ligj në Kuvend, për të përfituar një kredi të butë në masën 98.8 milionë euro nga Banka Evropiane për Rindërtim dhe Zhvillim, për ndërtimin e hekurudhës Vorë-Hani i Hotit, të gjatë 120 kilometra.
Në mars 2024, qeveria nënshkroi marrëveshjen, po për këtë hekurrudhë, për një kredi të butë nga Banka Evropiane e Investimeve, me vlerë 100 milionë euro. Kosto tërësore e hekurrudhës do të shkojë 373 milionë euro, ku, krahas dy kredive të buta nga dy bankat e mësipërme dhe parave dhuratë(grante) nga Korniza e Investimeve e Ballkanit Perëndimor, një strukturë e Procesit të Berlinit dhe e Planit të Rritjes së Bashkimit Evropian, një pjesë e financimit do të mbulohet edhe nga buxheti ynë i shtetit.
Hekurudha më e shpejtë e Shqipërisë
Punimet për rijetësimin e hekurudhës Vorë-Hani i Hotit do të zgjasin plot 6 vite, deri në vitin 2030. Faza e parë e rehabilitimit do të nisë në fund të këtij viti, për të përfunduar së ndërtuari në vitin 2030. Rehabilitimi i kësaj linje hekurudhore, ndër më të rëndësishmet për Shqipërinë, do të bëhet sipas parametrave të linjave hekurudhore moderne të sotme të Bashkimit Evropian.
Kreditë e buta që qeveria jonë po merr nga Banka Evropiane për Rindërtim dhe Zhvillim dhe nga Banka Evropiane e Investimeve, do të shlyhen brenda 17-20 viteve. Hekurudha e re do të jetë teresisht e elektrifikuar, ndërsa shpejtësia e lëvizjes së trenave të saj do të jetë deri në 120 kilometra në orë.
Në këtë mënyrë, koha mesatare e udhëtimit nga Vora në Hanin e Hotit do të jetë 2 orë, gjë që nuk ndodh asnjëherë me rrugën automobilistike sot, sado e pangarkuar nga trafiku të jetë ajo.
Tabela 1. Të dhënat e hekurudhës Vorë-Hani i Hotit
- Gjatesia 120 km
- Kosto 373 milione euro
- Koha e ndertimit 2024-2030
- Pasagjere ne vit 2,300,000 vete
- Mallra ne vit 900,000 tone
- Koha e udhetimit 2 ore
Qytetarët do të mbërrijnë në destinacionin që duan më shpejt dhe më lirë! Projekti parashikon ndërtimin e 12 stacioneve hekurudhore, ndërtimin e një tuneli me gjatësi 320 metra, si dhe ndërtimin e 12 urave.
Hekurudha parashikohet që të ketë një fluks prej 2.3 milionë udhëtarësh që në vitin e parë të funksionimit të saj, fluks që do të rritet me kohën, si dhe do të transportojë një vëllim mallrash prej 900 mijë tonësh në vit.
Hekurudha e kostove të ulura
Hekurudha Vorë-Hani i Hotit do të përfaqësojë një çlirim të vërtetë të kostove për qytetarët tanë, pasi konsumi i karburantit të makinave të tyre për t’u zhvendosur nga Durrësi e Tirana për në Shkodër e më tutje saj, është sot katërfish më i lartë, se sa vlera e biletave për të udhëtuar me trenin e ri!
Për të mos folur për amortizimin e makinave të qytetarëve dhe ndotjen e rëndë të mjedisit, nga gazrat nga automjetet me karburant, që sot përbëjnë 94 përqind të numrit të automjeteve që lëvizin nga Durrësi e Tirana për në Shkodër, si dhe anasjelltas. Apo për stresin e udhëtimit në një rruge tejet të ngarkuar, si dhe numrin e lartë të aksidenteve automobilistike, sidomos në aksin Tiranë-Laç-Shkodër.
Hekurudha Vorë-Tiranë ka një rëndësi të madhe strategjike për vendin. Ajo do të kontribuojë në zhvillimin e infrastrukturës së transportit hekurudhor në Shqipëri. Së bashku me hekurudhën Tiranë-Rinas-Durrës, edhe ajo tërësisht elektrike, e cila do të përfundojë së ndërtuari më shpejt, Vorë-Hani i Hotit është pjesë e Rrjetit Trans-Europian të Transportit “TEN-T” në Ballkanin Perëndimor.
Rehabilitimi i linjës hekurudhore do të sjellë infrastrukturën në standardet e BE-së dhe do të krijojë kushte për zhvillimin e shërbimeve të pasagjerëve dhe mallrave tek ne. Duke rritur cilësinë, sigurinë dhe besueshmërinë e shërbimeve tona hekurudhore, projekti do të zhvillojë transportin më të lirë dhe më ekologjik, atë hekurudhor në Shqipëri dhe më gjerë në rajon. Hekurudha, pas Hanit të Hotit, lidhet me linjat hekurrudhore të Malit të Zi e më tej të Bosnje-Hercegovinës, Kroacisë e Italisë.
Ajo do të lehtësojë jo vetëm kostot e transportit për qytetarët, por edhe atë të transportit të mallrave, me mbi 900 mijë tonët që do të transportojë në vit. Hekurudha Vorë-Hani i Hotit do të lehtësojë dhe nxisë më tej lidhjet tregtare dhe ekonomike me vendet fqinje dhe vendet anëtare të Bashkimit Evropian.
Për më tepër, investimi do të mundësojë rritje ekonomike dhe zhvillim social në Shqipëri dhe do të kontribuojë në objektivin afatgjatë për ndërtimin e ekonomive të gjelbra, të qëndrueshme dhe të integruara në Ballkanin Perëndimor. Kroacia dhe Italia do të jenë vetëm pak stacione larg, me këtë hekurudhë. Hekurudha lidh Shqipërinë jo vetëm me Malin e Zi, përmes stacionit të Tuzit, që vijon pastaj në Podgoricë, por realizon edhe lidhjen hekurudhore me kryeqytetet e tjera të rajonit, siç është Beogradi, Zagrebi, Lubjana e deri në Budapest.
Me këtë hekurudhë, plotësohet qasja tërësore e qeverisë që nga viti 2019, për një rrjet rrugor, aeroportual dhe hekurudhor, që i shërben ndërlidhjes më të mirë dhe moderne të Shqipërisë dhe ekonomisë së saj. Kjo ndërlidhje e përmirësuar do të jetë jo vetëm me vendet e Ballkanit Perëndimor, por edhe me shtete të Bashkimit Evropian, me të cilat Shqipëria do të rrisë ndjeshëm shkëmbimet e saj tregtare dhe njerëzore, si Italia, Kroacia, Sllovenia, Hungaria, etj.
