Nuk do kalojë shumë kohë kur i riu Hudi Shehu dhe kompania e tij “Postjer Agency” që po performon suksesshëm në Londër  \dhe e vlerësuar me çmime prestigjioze të jetë ndër më të kërkuarat edhe nga bizneset ne Shqipëri. Talenti shqiptar ngriti një agjensi me vizionin e tij dhe arriti të krijojë sisteme që u bënë për një periudhë të shkurtër të dobishme dhe të domosdoshme për bizneset që e shohin teknologjinë si një aleate të së tashmes dhe të ardhmes. E ndërsa kompanitë ndërkombëtare janë shumë koshiente për rëndësinë e këtyre shërbimeve, në Shqipëri ende nuk është rrënjosur një kulturë e tillë.  Në një intervistë eskluzive për Probizz.al themeluesi i “Postjer Agency”, Hudi Shehu thotë se sot kompania e tij ka krijuar partneritete serioze dhe ka fituar besimin e klientëve  falë korrektësisë, kualitetit të shërbimeve digjitale që ofron dhe risive në këtë industri. 

• Na flisni pak për studimet tuaja?

Faleminderit për ftesën dhe mundësinë të tregoj më tepër rreth vetes, një i apasionuar me teknologjinë që nga mosha 6 vjeçare. Mund të them se në atë moshë kanë qenë studimet e mia të para në teknologji, e më vonë me anë të bizneseve familjare, mësimet në biznes. Studimet i kam përfunduar në degën Informatikë Biznesi dhe MSc Sisteme Informacioni në Biznes. Patjetër që studimet kanë qenë të rëndësishme por siç e citova, njohuritë më të mëdha i kam marrë kur kam qenë pjesë e brand-it familjar në industrinë tekstile dhe më vonë në kompaninë Postjer Group.

• Formimi profesional si vazhdon pas studimeve, punimet e para?

Duke qenë se jam marrë me biznes para se të filloja studimet, gjatë vitit të fundit të studimeve, krijova kompaninë Postjer, fillimisht nisi një platformë dhe në dobi të komunitetit, pastaj u kanalizua drejt ofrimit të shërbimeve. Mendoj se njerëzit janë gjithmonë duke mësuar, prej përditshmërisë apo zgjedhjeve që bejnë në biznes. Unë jam një person që kohën time më të madhe e shpenzoj duke lexuar të rejat e fundit nga teknologjia dhe startup-et.

• Si nisi idea për të ngritur një Agency me shumë funksione të dobishme sot për bizneset dhe jo vetëm?

Postjer Agency fillimisht e kam ideuar në vitin 2022 kur kam vënë re se çfare i mungonte tregut sipas perspektivës dhe vizionit tim. Duke punuar me biznese të vogla në Mbretërinë e Bashkuar, duke ofruar vetëm sherbime web, dhe prej vlerësimeve të ndryshme nga klientët kemi filluar të zgjerojmë shërbimet tona duke u kompletuar si agjensi digjitale, dhe të jemi hallka kryesore për çdo biznes që dëshiron të ofrojë shërbimet nëpërmjet prezencës online. Postjer Agency është pjesë e Postjer Group dhe është fituese e shume çmimeve që prej vitit 2022 në fushën e Marketing dhe Teknologjisë.

• Një i ri që ndan jetën mes Shqipërisë dhe Londrës, me një botëkuptim krejt të qartë për të  bashkëpunuar me kompani ndërkombëtare? Kishit frikë me këtë guxim në këtë lloj tregu?

Bashkëpunimet e mia të para kanë qenë me kompani ndërkombëtare kryesisht në Londër, Berlin. Nuk mund të them frikë, por gjithmonë ka qenë risk që kam marrë pa njohur mirë gjithë tregun por vetëm disa segmente të saj. Por kjo gjë është kthyer në pozitive pasi kam fituar më teper eksperiencë dhe konfidencë, prej klientëve apo partnerëve që isha duke bërë cdo ditë. Gjithmonë Postjer Group ka qenë dhe është një kompani e sigurt, me besueshmëri për çdo partner me të cilin punojmë, duke pasur vetëm një fokus: rrugëtim sa më afatgjatë të çdo bashkëpunimi me partner apo klient.

• Idetë i keni mësë të qarta, sa e vështirë është t’i implementoni?

Nga eksperienca e fituar mendoj se gjërat bëhën më të qarta, por jo më të thjeshta. Mund të them se çdo projekt ka vështirësinë e vet pasi çdo projekt ka specifikimet teknike ndonjëherë tepër komplekse, por me ndihmën e ekipit gjithashtu implementimi bëhet gjithmonë i saktë dhe të qëndrojmë gjithmonë brenda kushteve te sigurisë për implementimet që kryejmë në çdo biznes.

• Si është bashkëpunimi me të huajt?

Postjer Group numëron më shumë se 30 partnerë dhe 30 klientë në vitin 2023. Më shumë nga këto biznese, janë të huaj, kjo për shkak se disa shërbime janë të kushtueshme për bizneset shqiptare. Të huajt kanë treguar gjithmonë interes për të punuar me kompaninë tonë dhe gjithë metodologjia e procesve të punës qe ne përdorim, gjithashtu çdo projekt është dërguar në kohën e dhënë sipas parashkimeve dhe kërkesave specifike nga bizneset.

• Po Shqipërinë si e shikoni në fushën e shërbimeve që ofroni, ka interes?

Shqipëria sipas meje është një vend që po zhvillohet cdo ditë e më shumë, më shumë sipërrmarrës të rinj janë duke u zhvilluar, jane duke u zhvilluar produkte dhe ide të cilat do ti sjellin patjetër ndryshim Shqipërisë, ama në fushën e shërbimeve që ofrojmë, mendoj se problemi është që shumë drejtorë biznesesh akoma nuk i kanë besuar digjitalizimit, janë pak skeptik dhe ajo çfarë ne duhet dhe po bëjmë është të edukojmë këta drejtues për shërbimet që ne ofrojme dhe pse janë të domosdoshme në këtë epokë. Për ne, Shqipëria ka qenë dhe do të jetë një vend ku ne do të jemi prezent, edhe me pak klientë apo projekte, dëshira jonë është të kontribuojmë në transformimin e bizneseve në Shqipëri. Interesi po rritet çdë ditë pasi shumë të rinj janë duke themeluar biznese dhe kanë më shumë njohuri dhe besim për  marketing digital.

• Jo vetëm keni depërtuar në tregjet e huaja por keni marrë edhe shumë medalje, cfarë ju bën të veçantë?

Qëndrueshmeria, kualiteti dhe vizioni mendoj se është ajo që na ka bërë të veçantë në treg. Gjithmonë qëllimi i kompanisë ka qenë që të ofrojmë mbështetje teknike për klientët në kohë shumë të shpejtë dhe kështu këmi fituar besimin e klientit, gjithashtu të gjitha projektet janë dorëzuar në kohë, dhe me kualitet të lartë si nga ana e design, po ashtu edhe zhvillimit.

• Ku e sheh veten pas 10 vitesh?

Mendoj se do të jem akoma pjesë e kësaj industrie dhe të jap kontibutin akoma më tepër për zhvillime dhe projekte që sjellin një fleksibilitet për komunitete të ndryshme, si dhe zhvillim ekonomik. Së bashku me Postjer Group do të mundohem të krijoj sisteme të cilat i nevojiten çdo biznesi apo koorporate dhe të jemi hallka më e rëndësishme e gjithë procesit, nga klienti jonë deri te klienti fundor.