“Përallat e Andersenit” botimi voluminoz i shtëpisë botuese “ALBAS”, i 99 përrallave më të njohura të shkrimtarit danez, tashmë është bërë pjesë e muzeut dedikuar autorit.
Lajmin e ka bërë të ditur ambasadorja shqiptare në Danimarkë.
Ambasadorja Elida Petoshati ka dhuruar librin gjatë një vizite në Muzeumin e shkrimtarit të mirënjohur danez Hans Christian Andersen.
Ambasadorja i dhuroi me këtë rast Drejtorit Dr. Henrik Harlov vëllimin e plotë të përrallave të Hans Christian Andersen, botuar nga shtëpia botuese ‘’Albas’’ dhe përkthyer me mjeshtëri nga Klodian Briçi, i cili u vlerësua këtë vit me Çmimin e Madh ‘’Hans Christian Andersen Award 2023’’.
‘’Përrallat e Andersenit’’ të përkthyera në gjuhën shqipe do të qëndrojnë këtej e tutje në raftet e bibliotekës së Muzeumit të Hans Christian Andersen, si një nderim për kontributin e botës sonë artistike në lartësimin e vlerave të kulturës evropiane dhe asaj botërore.
Më 2 prill 2023 në qytetin e lindjes së autorit Komiteti i Çmimeve H.C.Andersen, në teatrin e Odenses në Danimarkë, ndau tri çmimet “Andersen” për vitin 2023. Përkthyesi Klodian Briçi u vlerësua me çmimin për sjelljen në shqip të vëllimit të plotë të “Përrallave të Andersenit”, botuar nga shtëpia botuese “Albas”.
Ky është një çmim nderi i formës së librit me titull “Mit livsevetyr”, derdhur në bakër, nga artisti Jens Galschiot. Çmimi u jepet individëve dhe institucioneve që përcjellin, interpretojnë dhe tregojnë mbi shkrimtarin kombëtar danez dhe veprat e tij. Për këtë vit, njërin nga këto tri çmime e mori Shqipëria, një ngjarje jo pak me rëndësi në fushën e kulturës.
Në fjalën e saj të mbajtur gjatë ceremonisë përfaqësuesja e shtëpisë botuese “Albas”, Sofiana Filipi, theksoi mirënjohjen ndaj Danimarkës dhe Komunitetit të Çmimeve“H.C.Andersen”, për dhënien e vlerësimit, pasi Anderseni mbetet një nga autorët që shuan kufijtë dhe bashkon njerëzit përmes artit dhe imagjinatës.
