Në një njoftim të fundit, Ministria për Evropën dhe Punët e Jashtme nën kujdesin e Kryeministrit të Republikës së Shqipërisë, z. Edi Rama, ka njoftuar hapjen e regjistrimeve për Samitin e III të Diasporës. Ky samit nën organizimin e Agjencisë Kombëtare të Diasporës do të zhvillohet në Tiranë në datat 22-23 nëntor 2023.

Ky Samit i tretë i Diasporës do të fokusohet në diskutimet mbi të ardhmen sociale, politike dhe ekonomike të Shqipërisë. Qëllimi i këtij samiti është rigjallërimi i bashkëpunimit midis vendit amë dhe Diasporës, duke theksuar rëndësinë e rolit të diasporës në të ardhmen e vendit dhe në përballjen me sfidat e sotme dhe të ardhshme.

Ftesa për pjesëmarrje i adresohet të gjithë shqiptarëve që janë pjesë e diasporës dhe që kanë dëshirë të kontribuojnë në të ardhmen e vendlindjes së tyre. Pjesëmarrësit mund të regjistrohen në linkun e mëposhtëm:

https://docs.google.com/forms/d/e/1FAIpQLScklu0RnfARiYAeVgnwEychVn6T-JbIi2MOV1C1C7im92PriA/viewform

Dita e parë e organizuar në bashkëpunim me Qendrën  Studimeve dhe Publikimeve për Arbëreshet do ti dedikohet arbëreshëve,

Gjatë ditës së dytë nën organizimin e Agjencisë Kombëtare të Diasporës do të mbahen diskutimet të ndara në 7 panele.

Panel 1

Ekonomia, biznesi, investimet (Identifikimi i mekanizmave për nxitjen e  investimeve nga Diaspora; Mekanizmat për formalizmin e dërgesave (amnistia fiskale); Ide për krijimin e Ekosistemit të startup-ve; Promovimi dhe inkurajimi i prirjeve filantropike; Grante të dedikuara për të rinjtë që duan të hapin biznes në Shqipëri.

Panel 2

Kultura (Roli i kulturës dhe mbrojtja e trashëgimisë kulturore kombëtare; Bashkëpunimi i artistëve shqiptarë në diasporë; Roli i Diasporës në mbështetjen e produkteve dhe shërbimeve artizanale shqiptare).

Panel 3

Shëndetësia (Shkëmbimi i eksperiencës, kontributi dhe roli i mjekëve nga Diaspora në Shqipëri; Rrjetëzimi i mjekëve në diasporë, ndërveprimi me autoritet shqiptare, Urdhri i mjekut, Urdhri i infermierëve, Ministrinë e Shëndetësisë dhe Mirëqenies Sociale; Çertifikimi/liçensimi i mjekëve për tu bërë pjesë e sistemit shëndetësor në Shqipëri).

Panel 4

Arsimi (Forcimi i bashkëpunimit me diasporën akademike me qëllim rritjen e cilësisë së arsimit të lartë dhe kërkimit shkencor në vend; Krijimi i netëork-eve funksionale me studentët që studiojnë jashtë vendit me qëllim ruajtjen e lidhjeve me vendin amë dhe tërheqjen e tyre në tregun e punës në Shqipëri; Roli i rëndësishëm që luan shteti amë për ruajtjen e gjuhës dhe identitetit kombëtar në Diasporë).

Panel 5

Rinia (Projekte “Binjakëzimi me fokus të rinjtë”: Praktikat e bashkëveprimit midis të rinjve në Diasporë dhe në vendin e origjinës; Rrjetet e profesionistëve dhe studentëve; Krijimi i sipërmarrjeve nga diaspora).

Paneli 6 Diaspora dhe politika e jashtme. (Vota dhe Zëri i emigrantëve në Parlamentin e Shtetit amë Fushatë Ndërgjegjësuese/ Vota e Emigrantëve; Diaspora Diplomatike)

Paneli 7 Turizmi/ Bujqësia (Roli i diasporës në zhvillimin e turizmit në Shqipëri dhe mundësitë e bashkëpunimit me diasporën; Nevoja për angazhimin e diasporës në projekte konkrete turistike, promovimi i Shqipërisë nëpër botë; Agroturizmi – trend i ri i investimeve nga diaspora në Shqipëri; • Rritja e investimit në bujqësi, faktor i rritjes së volumit të prodhimit dhe shtimit të kapaciteteve të kapitalit njerëzor).

Samiti është një mundësi e rëndësishme për të ndarë idetë dhe vizionet për një Shqipëri më të mirë.