Fluturimi i radhës drejt krenarisë shqiptare nëpër botë, ishte destinacioni i Suelës, në Nurnberg, Gjermani.
20 vjetori i kompanisë së saj, “Maklerbuero Suela Haehnlein”, (Shitje Blerje te Pasurive te paluajtshme, Siguracione, Financime dhe Investime) mblodhi së bashku, plot miq të mirë, sipërmarrës, blerësit më të rëndësishëm dhe shitësit më të mirë ndër vite.
Por këtij eventi nuk i mungonte as prezenca dhe përshëndetja nga drejtuesit politik të Rrethit, Kryetari Z. Landrat Armin Kroder, i cili në fjalën e tij tha se ky lloj integrimi si Suela Hähnlein (Shkodra), është një shembull për të gjithë të ardhurit.
“Me dëshirë, arsim, vullnet dhe guxim, mund të arrish shumë të mira në jetë. Në këtë mënyrë në çdo vend bëhesh i mirëpritur”, theksoi ai.
Edhe pse gjuha gjermane ishte e panjohur për të, dhe rrjetet sociale do t’i ndërtonte nga fillimi. Ajo mori guximin dhe ndërtoi Jetën e saj në vendin ku jeton tani me bashkëshortin dhe shumë shoqëri të mirë rreth vetes.
Suela, një vajzë që në moshën 17-vjeçare mori udhëtimin e saj të jetës, për të hapur horizontin e një jete evropiane, u stacionua në rrethin e Nurnbergut në Gjermani.
7 vite studime për Biznes dhe Financat, ajo i kreu kur ndërkohë edhe punonte për të investuar Shkollën dhe Jetën e saj në Gjermani. Njohja me bashkëshortin e saj i dhuroi familjen që asaj aq shumë i mungonte. Ai, vlerësoi tek ajo pikërisht atë natyrë të fortë e të pamposhtur që mund të tërhiqte këdo me pastërtinë, të vërtetën, sakrificën dhe ndër të gjitha një histori jete, që tregon veç forcë dhe emocion.
20 vite sipërmarrje, 20 vite klientë, 20 vite miq, 20 vite përfaqësim i denjë i të qenurit shqiptare. Me kokën lart Suela prezantoi në këtë event historinë e jetës së saj. Prekëse aq sa në sytë e shumë gjermanëve u panë lot. Por njëherazi edhe gëzim për suksesin e saj.
Suela prezantoi në skenë, vizionin e ri të Biznesit të saj, ku theksoi se tashmë edhe ajo vetë është mëse e bindur të përfshijë Shqipërinë si një treg tashmë interesant edhe për qytetarët dhe bizneset gjermane.
Te ftuar ishin edhe Nënkryetarja e Dhomës së Biznesit të Diasporës Shqiptare znj. Elisabeta Katiaj dhe anëtari i asamblesë z. Denis Shkodra për të treguar dhe disa projekte konkrete në Shqipëri.
Zonja Katiaj e bëri prezantimin vetë në gjuhën gjermane dhe ajo tregoi që Shqipëria ka shumë persona intelektualë dhe që investorët të binden që Shqipëria është një vend inovativ dhe shumë modern për investime të tilla.
Nëpërmjet kohës së dedikuar promovimit të Shqipërisë, Nënkryetarja e Dhomës së Biznesit të Diasporës Shqiptare znj. Elisabeta Katiaj dhe anëtari i asamblesë z. Denis Shkodra, u tërhoq vëmendja e të gjithë pjesëmarrësve me avantazhet fiskale të prezantuara, me resortet luksoze turistike, me TEDA-Tiranë, me Projektin e Porto Romanos, me avantazhet që zoton tregu i energjisë sot në vendin tonë duke bërë të kuptohet se logjistika, energjia dhe turizmi, janë investimet e kohës në Shqipëri.
