Me “ Book lovers”

U bë një vit, nga qershori  2021, kur u krijua grupi i parë i intelektualeve , dashamirëse të librit, për promovimin dhe njohjen e autorëve sidomos të rinj shqiptar dhe jo vetëm, në Londër, UK.

Dikur takimet, e kujtoj me nostalgji, i bënim me shoqërinë në Bibliotekën Kombëtare të Tiranës apo të lagjes.

Tani ne jemi shpërndarë nëpër botë dhe e vetmja mundësi që kemi është të krijojmë diçka origjinale në shërbim të librit në gjuhën shqipe.

Kështu lindi dëshira të vazhdonim një udhë të lënë,  në vendet e Shqipërisë, prej nga vijmë.

Çdo njëra nga ne merr me vete një libër të përzgjedhur. Pa libër nuk ka takim.

Libri mund të jetë në gjuhën shqipe, italisht, anglisht ose edhe në ndonjë gjuhë tjetër.

Por diskutimi i tyre bëhet vetëm në shqip!

Motivi është njohja e autorëve të rinj shqiptar por edhe një rikthim i autorëve të njohur.

Ndaj parësi i jepet letërsisë shqiptare të çdo kohe.

Por kjo nuk e përjashton as letërsinë e huaj.

Libra të përkthyer në shqip ose jo.

Grupi organizon një takim në çdo stinë.

Këto intelektuale krijuan mundësinë që brenda një viti të ndajnë dhe të qarkullojnë  më shumë se 50-të libra të lexuara. Pasuri kolosale për mëndjen dhe shpirtin për një kohë kaq të shkurtër. Librat e diskutuar nuk përsëriten në takimet e tjera. Pra gjithmonë të rinj.

Takimet organizohen nga vet pjesëtaret e grupi në vende të ndryshme të Londrës.

Çdo njëra  ka të drejtë 10 -15 min të flasë për librin që prezanton. Të lexojë ndonjë paragraf interesant nga libri dhe të bëjë një prezantim biografik, të shkurtër, për autorin.

Mundësia e mirë për të shkëmbyer librat është edhe një okazion frytdhënës leximesh.

Organizimet bëhen edhe të ndërrthurura me ndonjë vizitë interesante ( muze, shtëpi librash, librari..etj) Eksperiencë e veçantë ishte  në shtëpinë e znj. Patricia Nugee, një koleksioniste e mrekullueshme e librave antik shqiptar sidoemos në lidhje me historinë e Heroit tonë Kombëtar, Gjergj Kastriota Skënderbeu. Apo ajo në The OAK pabin anglez në Kingston me guzhinë shqiptare. Apo mikpritja në periudhën e Krishtlindjeve pranë zonës Richmond.

Ndërsa këtë qershor me rastin edhe të përvjetorit të parë,  grupi do të bëj  të mundur vizitën në ambjentet e shtëpisë mbretërore Chiswick House and Garden e cila ka një histori tejet interesante të lidhur me kulturën e vendit ku zonjat shqiptare “ Book Lovers” kanë studiuar, punojnë dhe jetojnë.

Ndërrthurje kulturore midis librit në shqip dhe artit anglez si dëshmi integrimi dhe krenarie dy kombësie.

Libri në letër është një nga qëllimet e grupit dhe promovimi i blerjes së tij në librari pjesë edukuese edhe për brezat.

Qëllimi sublim është gjithmonë vlerësimi i gjuhës shqipe, letërsia shqiptare, letërsia e huaj e përkthyer në shqip, letërsia e huaj e diskutuar në shqip, lidhja e njerëzve nëpërmjet leximit, ndarja e ndjenjës emocionale dhe pasurimi nga ato që përcjellin pjesëmarreset në grup. Të gjitha këto nëpërmjet librit të lexuar.

Mesazhi nga Londra: Merr një libër, krijo një grup, lexo dhe shpërnda kulturë.

Nuk ka rëndësi sa herë mblidheni ka rëndësi të motivoheni për të lexuar gjëra me vlerë.

Dedikimi special, në këtë përvjetor të parë, ishin kartolinat nga Hemingway të cilat ne i shkruam me dashuri për njëra-tjetrën në shqip.