Më 27 dhe 28 maj, në Prishtinë është mbajtur Forumi i Bizneseve të Diasporës. Kjo ngjarje përmblodhi fjalime nga përfaqësues institucionesh vendore dhe ndërkombëtare, përfaqësues të komuniteteve të biznesit, takime B2B mes bizneseve të Kosovës me ato të diasporës, panel diskutimi me kryetarë komunash, vizita në kompani me potencial eksportues, etj.
Mbi 350 përfaqësues të bizneseve nga diaspora, të huaja, vendore dhe përfaqësues të institucioneve të ndryshme kanë marrë pjesë në ditën e parë të forumit. Ndër ta, 110 pjesëmarrës kanë qenë përfaqësuar biznese të diasporës dhe ndërkombëtare dhe 160 biznese vendore. 63% e bizneseve ishin me origjinë nga vendet gjermano-folëse (Gjermania, Zvicrra, Austria), pasuar me biznese nga vendet tjera si Finlanda, Norvegjia, Polonia, Franca, Italia, Holanda, Turqia, ShBA-të dhe nga Greqia, Shqipëria dhe Maqedonia Veriore. Ky forum është organizuar nga Organizata GERMIN, Degët Evropiane të Rrjetit të Bizneseve të Diasporës Shqiptare dhe USAID Kosovo Compete Activity.
Hapjen e forumit e bëri Kryeministri i Kosovës, Albin Kurti me një thirrje për diasporën e Kosovës.
“Thirrja jonë është që të kontribuohet për Kosovën, tashmë jo duke u sakrifikuar por duke kontribuar. Jemi në situatën që kemi nevojë për shkathtësi, dije dhe punën e mërgatës tonë dhe jo vetëm për financa”.
Drejtoresha e USAID Kosovo, Zeinah Salahi tha që Kosova dhe diaspora e Kosovës njihen për përkushtimin që kanë ndaj vendit dhe këtë e tregojnë përmes remitancave. Por ajo shtoi që do ishte mirë që këto remitanca të drejtoheshin ndryshe. “Imagjinoni që në vend që remitancat të shfrytëzoheshin për konsum, të shohim një rikthim domethënës në ekonominë e Kosovës”.
Kryetari i Nderit të Rrjetit të Bizneseve të Diasporës Shqiptare, Lazim Destani, tha që roli i diasporës shqiptare për zhvillimin e vendeve tona, është kyç. Sipas tij, diaspora paraqet një kapital jo vetëm ekonomik por edhe social dhe kulturor. Z. Destani theksoi se”Uniteti, forca e rrjetit dhe suksesi i tij reflekton drejtpërdrejt tek zhvillimi ekonomik dhe uniteti i trojeve tona etnike”.
Kryetari i Rrjetit të Bizneseve të Diasporës Shqiptare në Austri, Yll Blakaj u shpreh që takimet e tilla kanë për qëllim parësor të lidhjes së bizneseve të diasporës me ato të Kosovës. Ai ritheksoi rëndësinë e krijimit të një ‘shtëpie të bizneseve të diasporës’ në Kosovë, e cila do t’i shërbente investitorëve nga diaspora dhe komunikim dhe koordinim me institucionet shtetërore.
Në ditën e parë të forumit u mbajt edhe një panel diskutimi me: Kryetarin e Prishtinës, Përparim Ramën, Kryetarin e Prizrenit, Shaqir Totaj, Kryetarin e Gjilanit, Alban Hysenin si dhe Kryetarin e Suharekës, Bali Muharremaj. Me temen “Investimet e Diasporës në Komuna”, kryetarët e komunave shpalosen idetë dhe planet që kanë komunat e tyre për tërheqje të investimeve nga diaspora. Në përfundim të panelit u prezantua projekti “Diaspora për Zhvillim Ekonomik Lokal” implementuar nga GERMIN dhe i mbështetur nga Caritasi Zviceran, që do të ofrojë mundësi të investimeve nga diaspora në partneritet me Komunat e Kosovës.
Në pjesën e dytë të Forumit u mbajtën takime B2B në mes të bizneseve të Kosovës dhe atyre të diasporës e të huaja. Mbi 150 biznese nga diaspora dhe 100 biznese kosovare patën mundësi që të shpalosin veprimtaritë e tyre me qëllim të shtrirjes dhe mundësisë së eksportimit të produkteve e shërbimeve vendore përmes diasporës sonë. Gjatë pjesës së dytë janë realizuar 134 takime B2B ku mbi gjysma e tyre ishin të natyrës me mundësi për të krijuar partner potencial.
Dita e dytë – Vizitë kompanive vendore
Dita e dytë e forumit ishte e dedikuar për vizita në bizneset e Kosovës për të parë së afërmi kapacitetet prodhuese të kompanive vendore dhe investimeve nga diaspora. Dhjetëra përfaqësues nga bizneset e diasporës, vizituan biznesin ‘Daakonn’ në Ferizaj, i cili është një nga investimet më të mëdha nga diaspora në Ferizaj, pronë e vëllezërve Viqa që jetojnë në Gjermani.
Vizita e dytë ishte në kompaninë ‘RroniFer & KoBa’në Gjakovë. Tek fabrika RroniFer që merret me përpunimin e armaturës dhe metalit, u nënshkrua edhe një marrëveshje në mes të kësaj kompanie dhe kompanisë MTI me seli në Vjenë, për hapjen e përfaqësisë zyrtare të RroniFer në Austri.
Vizita e fundit gjatë ditës së dytë u bë në kompaninë ‘Vatër 1954’, me seli në Prizren. ‘Vatër 1954’ ka pëvojë të gjatë në sektorin e përpunimit të drurit, përkatësisht prodhimin e dyerëve dhe dritareve ‘dru/alumin’.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
