Akademia e Arteve dhe e Shkencave Filozofike në Bari ka nderuar poeten dhe shkrimtaren shqiptare Irma Kurti me titullin “Ambasadore për Shqipërinë”. Ky titull i jepet nga Senati Akademik si një personalitet që është dalluar për punën e saj si dhe për meritat e rëndësishme kulturore të arritura në fushën ndërkombëtare.
Akademia përbëhet nga intelektualë, profesorë nga universitete të shumta dhe studiues, të cilët ndajnë vlerën etike dhe estetike të Artit dhe të letërsisë bashkëkohore, që manifestohet përmes spektreve të ndryshme krijuese, të dijes dhe pjesëmarrjes shoqërore e kulturore duke favorizuar integrimin e mjeteve shprehëse të jetës dhe artit. Ajo ka për qëllim mbrojtjen dhe përhapjen e kulturës në territorin kombëtar dhe në botë, duke ushqyer dashurinë dhe adhurimin për qytetërimin italian.
Irma Kurti do të promovojë eventet kulturore të Akademisë, duke kontribuar për t’u dhënë atyre një vlerë të mëtejshme përsosmërie dhe prestigji. Një nga këto veprimtari aktualisht është Konkursi Akademik Ndërkombëtar për Letërsinë Bashkëkohore Lucius Annaeus Seneca(Seneka).
“Ky titull – thotë Kurti – më gëzon jo vetëm pse njeh kontributin tim në fushën e letrave, po edhe pse më jep mundësinë që të prezantoj për krijuesit shqiptarë, kudo që ata ndodhen, një nga konkurset më të rëndësishme në panoramën letrare italiane SENECA, i cili gëzon patronazhin e institucioneve të shumta dhe të rëndësishme italiane.
President Ekzekutiv i Konkursit është Massimo Massa, president Nderi Corrado Calabrò, president i Komisionit Pasquale Panella dhe Drejtuese artistike Maria Teresa Infante.
Konkursi mban emrin Seneca, një nga personazhet e letërsisë latine, i cili u dallua si një autor modern për përmbajtjen e veprave, për stilin e tij, për aftësinë për të dialoguar përmes një kodi të qartë komunikues. Kjo përzjedhje lind nga nevoja për t’i bërë konkurruesit të reflektojnë mbi temat themelore të ekzistencës, kusht thelbësor në udhëtimin e jetës së çdo qenieje njerëzore, për të dalluar midis të ligjshmes dhe të paligjshmes, midis rendit dhe kaosit, midis drejtësisë dhe padrejtësisë, midis së drejtës dhe së gabuarës.
Konkursi ka afat deri në datën 31 maj 2022 dhe krijuesit që banojnë jashtë Italisë mund të konkurojnë me një maksimum prej tre poezish në seksionin S. Poezitë duhet të jenë të shoqëruara nga versioni origjinal në gjuhën shqipe.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
