Në kuadër të Ditës Ndërkombëtare të Gjuhës Amtare, Ambasada shqiptare në Athinë organizoi një takim virtual me fokus në rëndësinë e mësimit dhe ruajtjes së gjuhës shqipe në diasporë, rolin e mësuesve, rolin e faktorit mjedisor, ndikimin e mësimdhënies të gjuhës amtare në zhvillimin dhe formimin intelektual, etik dhe moral të fëmijëve, promovimin e një edukimi dhe kujdesi gjithëpërfshirës në fëmijërinë e hershme, si dhe çështje me interes për komunitetin shqiptar në Greqi lidhur me mësimin e gjuhës shqipe.
Të pranishëm në këtë aktivitet ishin Zëvendës Ministrja për Evropën dhe Punët e Jashtme, znj. Megi Fino, Ambasadorja e Republikës së Shqipërisë në Greqi, znj. Luela Hajdaraga, Drejtoresha e Qendrës së Botimeve për Diasporën, znj. Mimoza Hysa, Oficerja Koordinuese për Diasporën në Athinë, znj. Joneda Dodaj, si dhe mësues vullnetarë të kurseve të mësimit plotësues të gjuhës shqipe anembanë Greqisë.
Në fjalën e saj, Ambasadorja znj. Luela Hajdaraga, ndër të tjera, ka theskuar se “Gjuha amtare është një dhuratë plot magji që të ngroh shpirtin dhe zemrën, që të mbush plot emocione të bukura – Gjuha amëtare është trashëgimia kulturore e një kombi – Gjuha shqipe është trashëgimia e vyer e kombit shqiptar!
Për ne sot, kjo është një ditë e veçantë komunikimi në gjuhën shqipe dhe për gjuhën shqipe – në përmbushje të misionit tonë kombëtar për ruajtjen dhe transmetimin e saj ndër breza.
Ky mision ka qenë dhe do të vazhdojë të mbetet detyrë prioritare e imja si Ambasadore dhe e Ambasadës që unë drejtoj.
Shpreh kënaqësinë për punën që ne, të gjithë së bashku – këtu në Greqi dhe institucionet tona në Shqipëri – kemi bërë në përmbushje të këtij misioni. Ambasada ka ndërtuar ura shumë të mira bashkëpunimi me Lidhjen e Mësuesve Shqiptarë dhe me gjithë mësuesit vullnetarë të gjuhës shqipe në Greqi, për shkëmbimin e ideve, për aktivitete dhe projekte, si dhe për t’i asistuar ata në çdo rast nevoje. Ambasada mbetet e përkushtuar në këtë drejtim’’.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
