Doktoreshë Marsela Ceno në një lidhje skype për emisionin “Open” në Top Channel ka deklaruar nga Gjermania se ky vend ka forcuar edhe më tej masat për të ndaluar shpërthimin e Omicron në këtë fundviti.

Ajo shtoi se tashmë në restorante lejohen të hyjnë vetëm personat e vaksinuar.

“Masat filluan që para Krishtlindjes, por duket se për vit të ri masat do të jenë edhe më të forta. Në Gjermani nuk lejohen festimet e vitit të ri në sheshe të mëdha. Të vaksinuarit do lejohen që të festojnë në ambiente të tjera, por edhe në shtëpi me 10 persona që janë të vaksinuar ose të shëruar. Grumbullimi i njerëzve është i ndaluar. Restorantet në natën e ndërrimit të viteve janë të lejuar të frekuentohen vetëm nga persona që janë të vaksinuar ose shëruar”, tha doktoreshë Ceno.

Ceno u shpreh se frika ndaj shpërhapjes së Omicron vjen jo vetëm nga frika e tejkalimit të resurseve spitalore, por e kolapsit të të gjithë sistemit për shkak të përhapjes së shpejtë e cila mund të lërë të gjithë në shtëpi në të njëjtën kohë.

Aktualisht ka 25 milion gjerman të pavaksinuar dhe marrja e masave shtrënguese edhe për të vaksinuarit, shton skepticizmin e atyre që janë të pavaksinuar.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.