“Shkolla Shqipe – Zvicër” në një kohë të shkurtër ja ka dalë të hapë një numër të madh klasash të mësimit të gjuhës shqipe si një mundësi për fëmijët me origjinë shqiptare të mësojnë gjuhën shqipe. Së fundmi njoftojnë se është hapur një tjetër klasë në Rotkreuz të Kantonit Zug në Zvicër.

Kjo është pika e tretë shkollore (pas Cham, Baar) në Kantonin e Zug-ut.

Me të drejtë thuhet: “Aty ku punohet nuk mungon suksesi”. Kjo thënie vjetër dëshmohet dita -ditës në kuadër të pikave shkollore. Të mërkurën, me datën 15 dhjetor 2021 edhe zyrtarisht filloi mësimi në pikën shkollore në Rotkreuz, të Kantonit Zug, në Zvicër” thotë për “Diaspora Shqiptare” koordinatori Vaxhid Sejdiu.

“A ka gjë më të bukur se të shohësh klasën plot nxënës nga të gjitha trojet shqiptare, të cilët hynë në klasë të motivuar për ta mësuar gjuhën amtare. Kështu ndodhi këtë të mërkure dhjetori ku dhjetëra nxënës nga Rahoveci, Dardana, Ohri, Gjilani, Ferizaji, Shkupi, Presheva, Ulqini etj., filluan mësimet në klasën e mësueses Lumnije Klinaku – Neziri. Gjuha dëshmon atdhedashurinë, prandaj edhe kjo sfidë është një rast i rrallë në jetë për këta fëmijë të cilët edhe pse kanë lindur larg atdheut dëshirën për ta mësuar gjuhën e nënës e kanë motiv jete. Sa më herët që të fillojnë me mësimet në gjuhën shqipe, aq më lehtë do ta mësojnë atë”, thuhet në njoftimin e Shkollës.

Vlen të theksohet se mësimi zhvillohet çdo të mërkure në dy grupe, nga ora 13.15 deri në orën 15.00, dhe grupi i dytë nga ora 15:00 -16:45, në shkollën fillore Rotkreuz, në komunën Risch të Kantonit Zug.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.