Ish-ambasadori i Shqipërisë në Gjermani e Greqi, Bashkim Zeneli ka promovuar librin e tij të dytë të titulluar “Miqësi e trazuar, Greqia në kujtimet e ambasadorit”  në ambientet e ambasadës shqiptare në Greqi.

Libri është bazuar në kujtimet e viteve kur Zeneli shërbeu si ambasador në Ambasadën Athinë, dhe përcjellë marrëdhëniet me Greqinë jo vetëm në këndvështrimin e një diplomati, por edhe në atë të politikanit dhe gazetarit, çka e ka ndihmuar të kryejë me sukses misionin e tij.

“E kam shkrujt me dashuri ktë libër sepse nuk e njoh urrejtjen midis popujve…ne duhet ti jemi mirënjohës Greqisë jo vetëm për pritjen e 800 mijë shqiptarëve por edhe mbështetjen e gjithëanëshme që na ka dhënë në procese demokratike, integruese…kemi punuar bashkë për të ndërtuar ura, kemi punuar për të kapërcyer edhe incidente të vogla dhe për të parë gjithmonë përpara nuk ecet kurrë perpara duke mbajtur kokën mbrapa” është shprehur në herët në promovim Zeneli.

Gjatë aktivitetit, Ambasadorja znj. Luela Hajdaraga vlerësoi tempin realist, bashkëkohor e pozitiv në marrëdhëniet shqiptaro-greke që përshkon këtë libër, si dhe përqasjen e z. Zeneli ndaj vendit fqinj, ku detyra e një ambasadori është të punojë për t’i çuar përpara marrëdhëniet mes dy vendeve.

Përvoja e dhënë nga ish ambasadori Zeneli në librin “Miqësi e trazuar” përbën një vlerë në fushën e diplomacisë dhe mund të shërbejë si një almanak për diplomatët e rinj.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.