Pas një pauze relativisht të gjatë dhe kufizimeve në lidhje me promovimin e aktiviteteve të diplomacisë kulturore, të dielën në ambientet e Konsullatës së Republikës së Kosovës në Zyrih u mbajt një aktivitet i kësaj natyre dhe ku të pranishëm ishin studentë, shkrimtarë dhe përfaqësues të ndryshëm nga shoqatat kulturore në Konfederatën e Zvicrës.

Më këtë rast, u promovuan edhe veprat letrare të autoreve, Kimete Kuqi Durmishi, dhe Drita Sadiku Bilalli. ‘’Jam ajo që isha’’, ‘’Kthimi në jetë’’ dhe ‘’Melodi e qetë’’ ishin tre veprat të promovuara të autores Berisha, ndërsa promovimi tjetër ishte romani ‘’Vrragë plagësh në vellon e mërgimit’’, i autores Sadiku Bilalli.

Ky aktivitet u organizua nga Konsullata e Republikës së Kosovës në Zyrih dhe Shoqata e Krijuesve Shqiptar në Zvicër.

Të pranishmit i ka përshëndetur me fjalë rasti Udhëheqësi i Konsullatës në Zyrih, z. Sami Kastrati dhe Këshilltarja në Konsullatë, znj Shukrije Ramadani, ndërsa debati u moderua nga Kryetari i Shoqatës së Krijuesve Shqiptar në Zvicër, z. Bujar Salihu, i cili bëri edhe prezantimin e librave dhe të autoreve.

Recitimi i poezive ishte e veçanta e kësaj mbrëmje letrare, ndërsa të pranishmit shtruan pyetje të shumta për autoret dhe botimet e veprave të tyre.

Konsullata e Republikës së Kosovës në Zyrih gjatë muajit nëntor do të vazhdojë me aktivitete të tjera të Diplomacisë Kulturore.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.