Ditën e sotme Komuniteti Shqiptar i Selanikut hapi veprimtaritë letrare të Klubit Letrar të Selanikut “Salonica Literature Club” me promovimin e librit të shkrimtarit Dhimitër Nica “Kur flet i vdekuri”.
Për këtë aktivitet në ambientet e Teatrit Mbretëror të Selanikut (Vasiliko Theatro), u mblodhën me dhjetra krijues dhe dashamirës të letrave, në praninë e përfaqësuesve të Konsullatës së Përgjithshme të Shqipërisë.
Pjesëmarrësit vlerësuan nismën e re të KSHS për krijimin e Klubit Letrar, dhe Dr. Luan Zyka parashtroi synimet dhe platformën e punës të kësaj vatre për promovimin e krijuesve shqiptarë jo vetëm të Selanikut, dhe gjithashtu jo vetëm për lexuesin shqipfolës, por edhe për publikun grek.
Për librin e parë të poetit Dhimiter Nica, ne fushën e prozës me vëllimin me tregime dhe novela “Kur flet i vdekuri”, folën krijuesit Rakela Zoga, Dashnor Selimi, Valentina Shabani, Anesti Qirinxhi, Luan Zyka etj.
Ata theksuan pasurinë e tematikave te librit, metaforat befasuese me ndjeshmërinë e tyre poetike, fatin e emigrantit shqiptar me problemet e jetës, ndjeshmërinë e autorit për njeriun e thjeshtë me botë të pasur etj.
Dhimitër Nica i lindur lind në Berat më 15 korrik 1963, prej më shumë se 20 vitesh në Selanik të Greqisë.
Ka filluar që në moshën 20-vjeçare të shkruaj poezi dhe vjersha të ndryshme. Gjithashtu, është marrë herët me shkrime, përshkrime, reportazhe, tema ekonomiko-shoqërore, etj., të cilat i ka botuar në organe të shtypit lokal e qendror të kohës. Në vitin 2012 me shtëpinë botuese “Toena” në Tiranë, ncjerr librin e parë me titullin simbolik “Pesha e fjalës”. Në vitin 2015, botoi librin e dytë me poezi, të titulluar: “Të gjitha lulet kanë emrin tënd”, me shtëpinë botuese “Muzgu”.
Është pjesëmarrës në më shumë se njëzet antologji poetike. Kështu gjendet në Antologjinë e dhimbjes, kushtuar të madhit Ali Podrimja në Prishtinë, midis 101 autorëve shqiptarë. Gjendet në disa antologji të botuara nga “Prishtina Press”, në 12 antologji të botuara nga studiuesi, krijuesi dhe shkrimtari Mark Simoni, në Tiranë. Është gjithashtu pjesëmarrës në antologji të ndryshme të botuara nga lidhja e shkrimtarëve dhe artistëve të Selanikut “Dega e blertë”, anëtarë i së cilës është prej shumë vitesh.
Është vlerësuar me disa çmime të ndryshme vjetore.
Boton herë pas here edhe prozë të shkurtër, si tregime e novela, në organe të ndryshme letrare dhe online. Gjithashtu, është i përfshirë edhe në një Antologji poetike, me fabula, epigrame e poezi satirike – humoristike botuar nga “Dega e Blertë” në Selanik.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
