Sot në Dyseldorf u mbajt Takimi Tradicional Letrar “Azem Shkreli”. Nën organizimin e Lidhjes së Shkrimtarëve, Artistëve dhe Krijuesve Shqiptarë në Gjermani ky manifestim mbahet për çdo vit në qytete të ndryshme gjermane duke bërë bashkë krijues, artistë e dashamirës të shumtë të fjalës së shkruar.
Në këtë manifestim mori pjesë edhe z. Lazim Destani, anëtar i Këshillit Koordinues të Diasporës.
Në fjalën e tij përshëndetëse ai e çmoi lart veprimtarinë krijuese dhe aktivitetin patriotike të shkrimtarit e poetit tonë të shquar, Azem Shkreli, me të cilin personalisht kishte patur afërsi dhe takime të shumta.
“Ishte kënaqësi pjesëmarrja në manifestimin, Takimi Tradicional Letrar “Azem Shkreli”. Ky aktivitet letrar e kulturor, që mban emrin e shkrimtarit e veprimtarit Azem Shkreli, u mbajt sot në ambientet e Klubit Ekonomik të Dyzeldorfit.
Nën organizimin e Lidhjes së Shkrimtarëve, Artistëve dhe Krijuesve Shqiptarë në Gjermani këtu u bënë bashkë shumë krijues, artistë e letrarë si dhe adhurues të fjalës së shkruar shqipe.
Me opusin e tij krijues, Azem Shkreli zë vend nderi në letërsinë shqipe. Poezia patriotike e Azem Shkrelit e bën atë të shquhet si njëri ndër lirikët tanë më modern. Nga kjo pjesëmarrje, u ndjeva i nderuar që pata rastin ta përshëndes auditorin si dhe artistët e krijuesit tanë në Diasporë”, u shpreh në Lazim Destani.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
