Është ndarë nga jeta ditën e djeshme aktivisti shqiptar Stefan Zonja. 56 vjeçari humbi betejën me një sëmundje të vështirë. Lajmin e ka bërë të ditur bashkëshortja e tij e cila ka ndarë edhe disa nga kauzat me të rëndësishme që ka mbështetur Zonja në vitet e fundit.

Stefan Zonja lindi dhe u rrit në Tiranë, Shqipëri. Në moshë të re u detyrua të emigrojë në SHBA, më pas edhe në Greqi, ku krahas punës së përditshme dallonte në shoqëri e ndër shqiptarë për vlera, fisnikëri e patriotizëm të kulluar si rrallë kush, gjë të cilën e shpalosi nëpërmjet aktiviteteve të shumta kuq e zi edhe në Mynih të Gjermanisë, ku jetoj e veproj prej 9 vjetësh.

Stefani së bashku me gruan e tij, Sindin (Donikën) si edhe një grup shokësh të mirë është iniciatori dhe organizatori kryesor i një sërë aktivitetesh të rëndësishme si: Manifestimi për 100 – vjetorin e Pavarësisë së Shqipërisë në qendër të Mynihut; (nëntor 2012), Manifestimi-Protestë për 100 vjetorin e Copëtimit të Trojeve Shqiptare, gjithashtu në shesh qëndror; (korrik 2013), Protesta për Heronjtë e Kumanovës përpara Konsullatës Maqedonase; (qershor 2015), Themelimin e 5 klasave të gjuhës shqipe nën siglën e LAPSH-it, në Mynih të Gjermanisë;(03-04-05-06-06/ 2017), Organizimin e shfaqjes “Gjergj Kastrioti Skënderbeu” në Mynih, realizuar dhe interpretuar nga Kolosi i Skenës Shqiptare, z. Xhevat Limani. (nëntor 2018), Kërkesën në emër të Komunitetit Shqiptar, autoriteteve Bavareze për ngritjen e Bustit të Skënderbeut në Mynih (përpjekjet vazhdojnë…) (korrik 2019), Organizimin për mbledhjen e ndihmave si monetare dhe materiale për të prekurit e tragjedisë në Atdhe. (nëntor 2019)

Gjithashtu gjatë këtyre 3 viteve të fundit krahas luftës me këtë sëmundje të pamëshirshme, Stefan Zonja ka themeluar: Shoqatën Kulturore-Humanitare Shqiptaro-Gjermane, si edhe Shkollën Shqipe me të njëjtin emër “Gjergj Kastrioti Skënderbeu“.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.