Arbëreshët e jugut të Italisë, kanë qenë të parët që u kanë zgjatur dorën për ndihmë emigrantëve shqiptarë të mbërritur më 8 gusht 1991 me anijen Vlora në Brindizi. Populli italian u tregua mikpritës me refugjatët shqiptarë dhe ishin pikërisht arbëreshët, ndër të parët që dolën për t’u ardhur në ndihmë shqiptarëve që mbërritën në Itali në fillim vitet ‘90.
Në kronikën e mëposhtme televizive të datës 10 gusht 1991 raportohet se mes ushtarëve italianë që kanë ndihmuar shqiptarët në kampin e Restincos, janë rreth 20 ushtarë arbëreshë, të cilët kanë njohje të gjuhës shqipe dhe kanë ndihmuar në komunikimin me shqiptarët. Gjithashtu, janë dy grupe përfaqësues të komuniteteve arbëreshe në Marzano dhe Piana Degli Albanesi, të cilët kanë ardhur t’i ofrojnë ndihmë vëllezërve të gjakut. “Arbereshët nga Marzano di San Giuseppe në Pulia kanë ardhur të shprehin solidaritetin e tyre ndaj vëllezërve shqiptarë”, thuhet në kronikë.
“Ne kemi ardhur t’i ofrojmë mikpritje vëllezërve tanë shqiptarë. Dhe pas kaq shumë vitesh, pas 500 vitesh për shkak të këtyre arsyeve historike, ata kanë bërë të njëjtën rrugë që bënë paraardhësit tanë. Edhe pse kemi qenë mijëra kilometra larg, ne e kemi përjetuar këtë fatkeqësi të vëllezërve tanë dhe mund të them se me ta jemi përqafuar tani si vëllezër. Është e qarte se duke qene se dhe ne kemi rrënjë shqiptare, sigurisht bukën tonë të përditshme do ta ndajmë me bashkë me ta”, shprehet një nga arbëreshët e Marzanos.
https://www.facebook.com/799972636790870/posts/3141466735974770/
