Një këngë e kënduar nga Elseid Hysaj përpara shokëve të tij e futi atë në polemika që nuk do t’ia kishte marrë mendja kurrë. Të shtunën në mbrëmje ekipi i Lazio-s kishte dalë për darkë pas stërvitjes dhe siç e do tradita, mbrojtësi kuqezi bëri prezantimin me këngën “Bella Ciao”.

Kjo është një ndër meloditë më popullore italiane dhe ka motive partizane, e gjithashtu kolonë zanore e serialit të njohur “La Casa del Papel”.

Shokët e ekipit e hodhën në rrjetet sociale performancën e Hysajt, por disa prej tifozëve, me bindje politike të ndryshme nga mesazhi që kënga përcjell u inatosën dhe u nisën për te lokali ku ekipi po darkonte.

Por Hysaj gjendej në hotel, e ata u drejtuan aty. Situata u qetësua pas ndërhyrjes së drejtorit sportiv Igli Tare, si edhe të policisë italiane. Një pjesë e tifozerisë laciale identifikohet me grupime që kanë prirje të së djathtës ekstreme.

‘Lufta’ mes Elseid Hysaj dhe tifozëve të Lazios duket se nuk ka të ndalur. Tifozët ultras të skuadrës kryeqytetase kanë shpalosur një banderolë ku ofendojnë mbrojtësin shqiptar pas këndimit të këngës “Bella Ciao”.

“Hysaj krimb, Lazio është fashiste,” shkruhet në banderolën e shpalosur në një nga zonat më të populluara të Romës së Veriut.

Rasti është mbyllur, ndërsa videoja nuk gjendet më në rrjetet sociale. Klubi i Lazio-s në një reagim zyrtar informoi se kënga u këndua në një ambient miqësor, e nuk përmban motiv politik. Klubi kërkon mbështetje maksimale nga tifozët e saj, pasi në prag të sezonit të ri, klima në skuadër duhet të jetë shumë e qetë.