Kompania ajrore zvicerane Helvetic Airlines do të ulet në Aeroportin Ndërkombëtar të Kukësit (KFZ) këtë të premte (9 korrik) duke filluar kështu fluturimet tregtare në aeroportin e ri të Shqipërisë. Fluturimi organizohet nga Operatori Turistik me bazë në Zürich, Illyrian Eagle.

Fluturimi i kthimit do të kryhet po sot, pas një ore e gjysmë të kohës së përgatitjes për kthim për në Zürich. Bileta me gjithë taksa nga Zyrihu në Kukës fluturimi i parë do të jetë 99 euro dhe nga Kukësi drejt Zyrihut do të jetë 69 franga zviceriane.

Fluturimi i parë nga Zürich për në Kukës do të pritet nga një ceremoni mirëseardhjeje në pistë dhe një konferencë shtypi për mediat dhe të ftuarit. Fluturimi është parashikuar të nisë në 10.15 nga Zyrihu dhe mbërritja në 12.20 në Kukës.

Aeroporti Ndërkombëtar i Kukësit ‘Zayed-Flatrat e Veriut’ ka një pistë prej 2.2 kilometrash dhe kullën e tij të vëzhgimit, ndërsa në pjesën e pistës, është projektuar të mbajë 3 aeroplanë njëkohësisht, ndërsa brenda një ore, 4 avionë mund të nisen nga Aeroporti i Kukësit.

Terminali zë një vend prej 3500 m2, ka 2 porta hyrëse dhe brenda tij një zonë muzeale përkujton luftën e Kosovës, e cila ishte gjithashtu pika fillestare e këtij aeroporti, si një dhuratë nga Emiratet e Bashkuara Arabe në ndihmë për refugjatët e luftës.

Vetë kryeministri Edi Rama me një postim në rrjetet sociale këtë mëngjes thotë se hapet kështu porta e dytë e qiellit të Shqipërisë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.