Federata e Mjekëve Shqiptarë në Europë organizoi Konferecën e IX-të Internacionale “EURO-Meeting, Doctors ACT 2together”. Konferenca u zhvillua në fund të muajit qershor me prezencë fizike të ekspertëve të njohur nga vendet evropiane. Në një intervistë për “Diaspora Shqiptare” Kryetarja e Federatës së Mjekëve Shqiptarë në Evropë, Aurora Dollenberg tregon më shumë detaje rreth konferencën e cila pas një viti të vështirë pandemik arriti të zhvillohej me prezencë fizike në Bruksel.
Në fund të muajit qershor zhvilluat me sukses Konferencën e IX-të ndërkombëtare mjekësore në Bruksel. A ishte i vështirë organizimi me prezencë fizike, nisur nga fakti që ende ekzistojnë disa protokolle anti-Covid?
Federata e Mjekëve Shqiptarë në Europë organizoi në Bruksel javën e kaluar konferencën e parë postpandemike me prezencë fizike të mjekëve shqiptarë nga mbarë Europa. Organizimi i një eventi të tillë pas një viti “Lockdown” pati vështirësi të mëdha burokratike, edhe pse mjeket ishin të gjithë të vaksinuar dhe me pashaportë vakninimi. Për mjekët e ardhur sidomos nga Ballkani për dhe disa vende të tjera evropiane duhet te kishin një vizë paraprake nga ambasada belge muaj të tërë kemi punuar për marrjen e lejes së kalimit në shtetin belg. Dhe rezultati ishte për të gjithë triumfues: Arritëm të mblidhemi si mjekë nga 25 vende të Europës, një Eurovizion i vërtet për mjekët dhe heronjtë e pandemisë.
Një event ku shkëmbimi profesional dhe shkencor janë objektivi kryesorë. A ishte efektiv eventi dhe cilat ishin disa propozime që mendohet se do të konkretizohen?
Konferenca e 9-të ndërkombëtare e Federatës së mjekëve arriti objektivat e saj kryesore të shkëmbimit shkencor dhe profesional. Studimet më të fundit të referuar nga mjekët shqiptarë, që punojnë në sisteme të ndryshme shëndetësore europiane, sollën fjalën e fundit të shkencës mbi protokollet e trajtimit mbi medikamentet për shërimin e covid 19. Disa vende evropiane si Gjermania., Franca apo Izraeli kanë filluar me studimet klinike mbi këto medikamente, të cilat shërojnë pacientët me simptoma të mesme dhe të rënda të COVID. Edhe pse për fatin e mirë vetëm 5 deri në 10% të pacientëve e kalojnë covidin me komplikacione të rënda, është detyra jonë si mjeke të kujdesemi që edhe kjo përqindje e popullatës të shërohet në kohë, duke ulur kështu komplikacionet covidiane dhe vdekjet spitalore në Shqipëri.
Sa të vlefshme janë të tilla konferenca të përmasave të mëdha për kontributin e ekspertëve të Diasporës në vendlindje?
Konferenca e 9-te internacionale e Federates në Bruksel mori një vlerësim objektiv maksimal nga çdo mjek dhe pjesëmarrës, të cilët cilësuan se këto evente janë mëse të domosdoshme për Networking dhe bashkëpunimin e mjekëve me njëri-tjetrin. Për më tepër mjekët krijuan urat e bashkëpunimit në Bruksel edhe me bashkimin evropian. Qëllimi i të ardhmes së afërt për Federatën e Mjekëve Shqiptarë në Evropë është që të lobojë për integrimin e vendeve shqipfolëse në BE. Siç e dimë sistemi shëndetësor është një ndër pengesat kryesore për të qenë anëtarë i BE-së. Këtë pengesë duam ne si mjek në bashkëpunim të ngushtë me politikëbërësit e shëndetit në vendet shqipfolëse ta kalojmë bashkërisht. Diaspora mjekësore është një ndër shtyllat kryesore për një mjekësi më të mirë shqiptare dhe me standarde evropiane. Kjo është motoja e mjekëve të federatës si pjesë e misionit dhe qëllimeve tona humanitare.
Pandemia e tregoi më së miri se specialistët shqiptarë të bluzave të mëdha në botë janë të shumtë, a ishte kjo pandemi një urë që forcoi më shumë bashkëpunimet mes shqiptarëve në Diasporë dhe vetë ekspertët e Diasporës me Shqipërinë?
Pandemia ishte një sfidë si për pacientin shqiptar ashtu edhe për bluzat e bardha. Por nga ana tjetër COVID-19 përbën njëkohsisht një shans unik për ta çuar mjekësinë shqiptare një hap më përpara. Pamë gjate pandemisë sa të rëndësishëm ishin mjekët dhe mantel-bardhët. Ne si federatë e mjekeve kemi realizuar vullnetarisht konsulitime falas përmes Telemedicines për gjithë pacientet shqiptare, kemi sjell ne kohe reale protokollet e terapive me efikase ne konferencat e vazhdueshme internacionale te akredituara. Federata e Mjekeve në Europë e ka forcuar vazhdimisht komunikimit zyrtar me institucione të shëndetit dhe me personelin mjekësor në shqipëri. Kjo na ka mundësuar komplementimin dhe plotesimet e mangesive që vumë re në kohërat e renda pandemike. Jemi krenar që kanë kontribuar sadopak në baza vullnetare në përmirësimin dhe sensibilizimit për një shëndet më të mirë. Se muajt e fundit kemi qene iniciator edhe të sigurimit të mijëra dozash vaksinash për Shqipëri dhe Kosovë.
Sa ndikojnë konferenca të tilla në zhvillimin e sistemit shëndetësor shqiptar?
Konferenca e IX-të mjekësore që organizuam në Bruksel ishte dëshmi e domosdoshmërisë për të mbledhur se bashku dhe për të hulumtuar te rejat më të fundit të mjekësisë moderne dhe gjetja e rrugëve se si ti sjellim edhe në Shqipëri. Nuk është asnjëherë e lehtë krijimi i rrugëve të reja, por kur disa ekspertë bëhen bashkë, ky mision i pamundur, bëhet shumë shpejt i arritshëm përmes angazhimit serioz. Eksperienca e deritanishme të federatës së mjekëve kanë treguar që puna vullnetare e mjekeve të Diasporës në Federatë, ka pasur një efekt te jashtëzakonshëm në sigurimin e vaksinave kundër covid-19 përmes bashkimit evropian BE. Puna jonë si federatë është një domosdoshmëri e kohës dhe madje e dëshiruar shumë si nga popullata shqiptare, por edhe nga sistemi shëndetësor shqiptar. Jemi mirënjohës për bashkëpunimin shumë të mirë që kemi pasur vazhdimisht. Me ministrinë e shëndetësisë të Shqipërisë, sidomos zv. Ministren Prof. Dr. Mira Rakacolli dhe drejtorin e urgjencës kombëtare të mjekësisë zotin Dr.Skënder Brataj, të cilin i kemi pasur dhe të pranishëm në konferencën e IX-të ndërkombëtare ne Bruksel. Falenderime të veçantë për mbështetje dhe bashkëpunim dedikohen Ambasadave shqiptare në Berlin-Bruksel-Hage-Romë, Konsulles së Nderit në NRW-Gjermani Znj. Anduena Sephan, Znj. Anila Hyka Nënkryetare për Këshillin Koordinues të Diasporës dhe gjithë partnerët tanë europian.
Nëse flasim për pandeminë, sa e rëndësishme është vijimësia e procesit të vaksinimit?
Shifrat në rënie të incidencës. në javët e fundit vërtetojnë se vaksinimi është arma më e fortë kundër pandemisë, prandaj dhe vazhdimi i procesit të vaksinimit paraqitet si e vetmja rrugë për të ndaluar pandeminë. Jemi të gjithë të vetëdijshëm tashmë se vetëm vaksinimi masiv prej 60% të popullatës është Bileta për drejt lirisë dhe daljes nga pandemia. Edhe Shqipëria ka pasur një numër shumë të vogël të të infektuarve në javën e fundit dhe një rënie të vdekshmërisë. Patjetër që një numër sa më i lartë të të vaksinuarve deri në 14% të popullatës, ka pasur efektin e saj pozitiv në ecurinë e deritanishme pandemike. Urojmë që ky ritëm i vaksinimit të vazhdohet pa ndërprerje.
Mendoni se do të ketë një valë të re në shtator?
Nëse procesi vaksinimit vazhdon pa ndërprerje dhe qytetarët janë vigjilentë që të respektojnë distancën sociale dhe mbajtjen e maskave mbrojtëse në ambientet e mbyllura me siguri mund ta parandalojmë një valë të katërt në vjeshtë. Vera dhe shtatori janë të sigurta; nëse qytetarët dhe institucionet shëndetësore i bëjnë detyrat e shtëpisë me korrektësi. Qytetaret duhen te paraqiten tek mjeku dhe të marrin sa më shpejt vaksinën dhe nga ana tjetër personeli mjekësorë duhet ti vazhdoi me intensitet procesin vaksinimit.
Keni menduar një datë për konferencën e X-të?
Më Datat 1-3. Tetor 2021 do zhvillojmë konferencën e rradhës në Amsterdam me mbështetjen e koordinatoreve të Federatës në Hollandë me në krye Znj.Ornela Ademi- Këshillitare pranë EMA (European Medicines Agency) struktura evropiane e çertifikimit të vaksinave./Diasporashqiptare.al/
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
