Pjesa e dytë e takimit të organizuar ditën e sotme në Tiranë në Ditën Ndërkombëtare të Remitancave, organizuar nga “Agjencia Kombëtare e Diasporës” ishte dedikuar për u ndal te diskutimi dhe propozimet për nxitjen e Diasporës për të rritur remitancat në vendlindje.
Fokusi i fjalimeve në pjesën e dytë ishte: Identifikimi dhe promovimi i politikave, programeve dhe praktikave më të mira të institucioneve financiare në lidhje me forcimin e kontributit të Diasporës.
Lexo edhe: Dita e Remitancave, Majko:Të krijojmë model për ti dhënë hov zhvillimit ekonomik
Pjesën e dytë të takimit e hapi Dr. Z. Ilir Gëdeshi i Qendrës së Studimeve Ekonomike dhe Sociale, i cili vuri theksin në masat që duhen marrë për të nxitur rritjen e remitancave nga Diaspora: “Ndryshimi i modelit pas krizës ekonomike globale, me ndryshimin gjeografik të emigracionit të ardhurat janë më të larta dhe remitancat duhet të jenë më të larta. Studimet që kemi bërë në vitin 2010 në disa vende, tregojnë se emigracioni shqiptarë ka më shumë kursime dhe më pak remitanca dhe raporti është 1 me 5 mes kursimeve dhe remitancave. Nëse vetëm 20 për qind e kursimeve do të përdorej për remitanca do të sillnin më shumë zhvillime. Për të nxitur remitancat duhen marrë dy masa mendoj: 1. Duhet të rrisim besimin e Diasporës; 2. Duhen politika të reja që të nxisim remitancat e Diasporës për zhvillimin e vendit.”
Në fjalën e tij anëtari i Këshillit Koordinues të Diasporës, Lazim Destani, u shpreh se kontributi i Diasporës shqiptare ka qenë gjithmonë i jashtëzakonshëm: “Të nderuar panelistë dhe ju që merrni pjesë dhe e përcillni këtë konferencë, ndihem i nderuar të jem i pranishëm në një ngjarje si kjo që lidhet me Diasporën pasi dhe vetë jam pjesë e saj. Është një rast i mirë që sot në ditën ndërkombëtare të remitancave të reflektojmë. Roli dhe kontributi i Diasporës shqiptare gjithmonë ka qenë i jashtëzakonshëm në zhvillimet e përgjithshme të vendeve tona, ndërsa kur është fjala për zhvillimin e vendeve të tona remitancat luajnë një rol shumë të rëndësishëm. Më parë remitancat kanë qenë në nivel të ulët dhe janë përdorur më shumë për ekonominë familjare, ndërsa sot janë në një nivel më të larta që ndikojnë në ekonominë e vendit. Në takime të ndryshme me afaristët e Diasporës kemi diskutuar idenë e krijimit të një fondi për investime kapitale në vendin tonë. Gjithashtu një formë tjetër mund të jenë mekanizmat e garancisë që jep qeveria. Qeveria mund të krijojë partneritet me bankat evropiane dhe ekspertë të fushës do të menaxhonin këto fonde. Në gjirin e diasporës tonë ka shumë profesionistë të afta që e kanë dëshmuar veten në fusha të ndryshme. Një mundësi shumë e mirë do të ishte dhe krijimi i kushteve nga institucionet e shtetit për bashkëpunime me institucione të rëndësishme në botë. Tashmë kemi dhe Dhomën e Biznesit të Diasporës në Tiranë që është një urë lidhëse për bashkëpunime dhe organizime”, përfundoi Destani.
Lexo edhe: Takimi/ Ekspertët : Ja problematikat e Remitancave gjatë vitit pandemik
Punët konkrete janë thelbi i nxitjes së Diasporës për kontributin në rritjen e remitancave, u shpreh Anila Hyka, anëtare e Këshillit Koordinues të Diasporës “Prej vitesh flasim dhe dëgjojmë kontributin patriotik dhe financiar të Diasporës dhe kjo tregohet me fakte dhe shifra. Pritshmëria që pata është që përveç shifrave dhe përgëzimeve do doja të shikoja disa element më konkret. Pjesa më e madhe e remitancave vijnë më shumë në cash dhe jo përmes bankave, kjo ndodh edhe për shkak të kostove të larta të transfertave, kjo ndodh edhe për shkak mosmarrveshje të bankave të Shqipërisë me bankat evropiane dhe botërore. Lidhur me depozitat sot për sot sa mund të garantojë banka që Diaspora të vendosë kursimet në këto depozita. A kanë Diaspora llogari banke në Shqipëri? Sigurisht që kanë po përgjithësisht bëhen nëpërmjet familjarëve dhe me një adresë të deklaruar në Shqipëri. Diaspora është e gatshme të jap kontributin e vet dhe ka dhënë prova, por I takon institucioneve të jenë më të hapura dhe më kontrate dhe nga takime të tilla të ketë më shumë shembuj konkret.”
“Rritja e besimit të Diasporës është shumë e rëndësishme për rritjen e remitancave”, ishte ky fokusi i fjalimit të Ardian Lekaj, Kryetar i Dhomës së Biznesit të Diasporës: “Ju falenderoj për këtë organizim shumë interesant në Ditën e Remitancave, është kënaqësi të marrësh pjesë në një event të tillë dhe të shkëmbesh mendime me kolegët. Në këtë takim u bë një përmbledhje e statistikave dhe një nga pyetjet që Ilir Gëdeshi nxori në pah ishte: Si do të rritet besimi i Diasporës? Rritja e besimit të Diasporës është shumë e rëndësishme për rritjen e remitancave. Besimi rritet kur ti je në trojet shqiptare dhe ndihesh si në shtëpinë tënde, nëse ndihesh në shtëpinë tënde, sigurisht që do të bësh diçka ekstra në shtëpinë tënde. Si mund të na e jepni? Loboni për ne, të na jepet e drejta e votës, si ju votoni atje, edhe ne duhet të votojmë. Në vitin 2020 pati një rënie të theksuar të remitancave në botë, por kjo nuk ndodhi në Shqipëri. Pse nuk ndodhi kjo? Ose jemi shumë të varfër, ose çështja emocionale, por e sigurt është që lidhja sociale që ne si komb kemi me njëri-tjetrin është e pakrahasueshme me vende e tjera. Unë jetoj prej 30 vitesh në Holandë, por mendjen, sytë, veshët i kam tek ju. Disa nga ju komentuan politika të reja financiare dhe sigurisht ju jeni ekspertë dhe do të punoni që tí realizoni këto pika, por ajo që unë do këshilloja është përdorimi i remitancave si kolateral për periudhë krizash. Gjithashtu krijimi i një sistemi regjistrimi të struktuaruar për të luftuar informalitetin. Dhoma e Biznesit të Diasporë është e krijuar pikërisht për të qenë një urë bashkëpunimi dhe ju ftoj të anëtarësoheni.”
Në fjalën e saj përmbyllëse Elizabeta Katiaj, Kryetare e Unionit të Sipërmarrëve të rinj u shpreh e gatshme për krijimin e një grupi pune, i cili në takimin e radhës do të sjell propozime kontrete: “E gjithë politika e strukturimit të remitancave lidhen ngushtë me faktin e politikave dhe kjo arrihet me lobimin e Diasporës. Jemi në një situatë ku Diaspora për herë të parë ka institucione të konsolitduara për të gjithë shqipfolësit. Mbetet një detyrë e rëndësishme për të dhënë disa propozime kontrete. Unë mendoj të krijojmë një grup nga I cili mund të lindin shumë ide për investime strategjike të remitanca. Kjo konferencë nuk duhet të mbetet me këtë takim por të konkludohet me një listë propozimesh që duhet tí shkojë qeverisë për rritjen e remitancave dhe për të përmirësuar kostot e tranfertave kudo në botë në lidhje me Shqipërinë.”
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
