U luajt sot ndeshja e dytë e Kampionatit Europian, me Zvicrën dhe Uellsin, që bënë një ndeshje të bukur dhe me ritëm, por në fund ndanë nga një pikë pas barazimit 1-1, që gëzon më shumë Italinë, se skuadrat në fjalë.
Pjesa e parë në stadiumin Olimpik të Bakusë u mbyll në barazim pa gola, me skuadrat që kishin nga një rast flagrant për të tundur rrjetën, por portierët u treguan në lartësinë e duhur dhe shpëtuan portat respektive.
Yann Sommer shpëtoi portën e Zvicrës në minutën e 15-të. Kros nga e majta, goditje me kokë e Kieffer Moore, sulmuesit të Cardiff City. “Gardiani” i M’Gladbach fluturoi në ajër dhe shpëtoi portën e tij falë një pritje shumë të bukur.
Zvicra u zgjua, reagoi dhe pesë minuta më vonë ishte pranë realizimit të një goli fantastik. Mbrojtësi i Neëcastle, Fabien Schar tentoi të kapte në befasi portierin kundërshtar me një finte. Veprim i bukur teknik i 29-vjeçarit pas krosit të Xherdan Shaqirit, por “gardiani” Danny Ward i Leicester City devijoi topin në këndore.
Pjesa e parë e duelit të dytë të grupit A të Euro 2020 u mbyll pa gola, ndërsa fraksioni i dytë nisi me rrjetën e kombëtares helvete. Minuta e 49-të, krosim i Xherdan Shaqirit nga goditja e këndit dhe finalizim me kokë i Breel Embolo, sulmuesi i Borussia M’Gladbach.
Pas golit të pësuar Uellsi nisi të reagojë dhe të vizitojë me shpesh portën e Sommer. Në minutën e 74 erdhi edhe goli i barazimt, që vulosi rezultatin e kësaj ndeshje. Kieffer Moore shfrytëzoi në maksimumin krosin e Joe Morrell dhe shënoi një gol me shumë vlerë.
Në minutën e 86, Zvicra shënoi golin e fitores, por VAR hyri në skenë dhe e anuloi, duke e mbyllur këtë ndeshje me shifrat 1-1. Me këtë rezultat, Italia ruan vendin e parë në renditje me 3 pikë dhe ndiqet nga Uellsi e Zvicra, që ndanë sot nga një pikë. Turqia mbetet me asnjë pikë.
FORMACIONET ZYRTARE –
UELLS – (4-3-3): Uard; Roberts, Rodon, Dejvis, Mefam; Morrell, Alen, Ramsej; Xhejms, Mur, Bejl. Trajner: Robert Pejxh.
ZVICRA – (5-2-3): Somer; Mbabu, Elvedi, Shar, Akanji, Rodrigez; Xhaka, Frojler; Seferoviç, Embolo, Shaqiri. Trajner: Vladimir Petkoviç.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
