Endriti ishte vetëm 20 vjeç kur krijoi aplikacionin e tij të parë për telefonë, “Movie Diary” një projekt që nisi nga një bisedë miqsh fakulteti se si mund të kalonin kohën e lirë gjatë kohës që nuk ishin në universitet.
Projekti pati mjaft sukses dhe Endriti vijoi me edukimin e tij profesion, madje duke ndjekur dhe studime në kompaninë Huawei për zhvilluesit (developer)për tu rikthyer në vendlindjen e tij në Kumanovë, Maqedonia e Veriut.
Pas Movie Diary ai solli aplikacionin Applinka, por që për shkak të pandemisë nuk e ka arritur ende qëllimin e saj. Në një intervistë për “Diaspora Shqiptare” Endriti, zhvillues aplikacionesh për telefonë smart, tregon se e ka shfrytëzuar këtë kohë për të krijuar një aplikacion që shkarkon video nga LinkedIn, nisur dhe nga fakti i zhvillimit të mësimeve online dhe ka në dorë dhe një tjetër projekt.
A do e bënte ai një aplikacion ku bashkon të gjithë shqiptarët? Epo, ky është një nga planet e tij në të ardhmen duke thënë se ne “kemi nevojë për nje aplikacion që do të na bashkojë të mësojmë dhe të punojmë më shumë për të dashurën Shqipëri dhe ta përfaqësojmë sa më mirë në botë.”
INTERVISTE
Endrit si po e kaloni situatën e krijuar nga pandemia në Kumanovë, si paraqitet situata në Maqedoninë e Veriut?
-Situata në Maqedoninë e Veriut është më e ndërlikuar sesa në vendet e tjera të rajonit. Sipas vdekshmërisë, për fat të keq jemi në vendin e 8-të në botë. Ajo që është më shqetësuese këtu tani është se stresi ka kapluar njerëzit dhe energjia negative po mbizotëron. Jemi në një atmosferë negative.
Na rrëfeni diçka më shumë lidhur me projektin tuaj të fundit dhe a keni hasur vështirësi në këto kohë ku duket se gjithçka bëhet online por ka problemet e veta.
-Natyrisht qe na ka humbur motivimi dhe dëshira për të parë të ardhmen. E dimë që mësimi online kishte vështirësitë e veta dhe aspak efikasitetit, ajo që unë shfrytëzova gjatë kësaj periudhe ishte koha e lirë. Kam punuar në dy projekte , ku për njerin po pres aprovimin e Google që të lancohet. Aplikacioni është një app i vogel që të lejon të shkarkosh video nga LinkedIn.
Më herët ju keni sjellë aplikacionet Movie Diary dhe Applinka. Përsa i përket të parës jeni shprehur se e krijuat pas një bisede mes miqsh se si mund të kalohet koha e pushimeve kur janë larg bankave të shkollës dhe universitetit. Këtë vit në fakt kemi qëndruar më shumë në shtëpi dhe larg njëri-tjetrit. Si e shihni Movie Diary në këtë kohë? A ka pasur më shumë shkarkime.
-Në fakt duket që pandemia ka ndikuar aq shumë saqë njerezit nuk kan patur mendjen të mendojnë diçka tjetër përvec ‘virusit’. Shkarkimet e aplikacionit “Movies Diary” po ecin njësoj dhe deri tani ka kapur shifren e 35,000 shkarkimeve. Si një aplikacion i vogël që është mendoj që ka kaluar qëllimin që ka patur. Jam shum i lumtur.
Më pas krijuat aplikacionin Applinka, që të lejon të sfidosh shokët me disa gara që ka brenda të cilës do të kenë impakt në mbrojten e ambientit. Disa nga sfidat që mund të krijosh janë: Ecje deri në punë, vrapim, pastrim i parqeve, riciklim dhe shumë të tjera. Sa i rezistojnë kohës së sotme këto sfida?
-Në fakt të mirëmbash një projekt si “Applinka” është shumë e vështirë. Duhet shumë punë, menaxhim i mirë, grup i organizuar dhe financim.Për atë arsye projekti akoma nuk ka kapur atë qëllimin që e ka por do t’i vije dita.Tani në këtë kohë është e vështirë që të përdoret për arsye se një ndër qëllimet e aplikacionit është socializimi i njerëzve ndërsa në këtë kohë kjo është edhe e ndaluar për shkak se duhet të respektohet distanca.
Ju jeni vetëm 21 vjeç dhe moshë ku lidhjet shoqërore kanë rëndësinë e tyre. A keni kontakte me shqiptarë të tjerë të rajonit, flas nga Shqipëria, Kosova dhe Mali i Zi, por dhe shqiptarë nëpër botë? Jo pa qëllim e bëra këtë pyetje. A keni menduar të krijoni ndonjë aplikacion që i shërben shqiptarëve kudo që janë?
Rrjetet sociale ndihmojnë shumë në këtë aspekt të socializimit, por jo dhe aq shumë nga ana tjetër. Kontakte kemi por mungojnë organizimet apo mbështetja për të rinjtë. Tek ne është shumë e vështirë të ngritesh dhe të marrësh mbështetje nga institucionet shtetërore, në Shqipëri dhe Kosovë u jepet mbështetje me aq sa kam parë.Shpresoj që viti 2021 të na gjejë më të mobilizuar dhe t’i japim krahun njëri-tjetrit.
Sa i përket një aplikacioni që do jetë për gjithë shqiptarët e kam menduar pikërisht këto ditët e fundit dhe jam e sigurt që një ditë do të bëhet por nuk kam akoma një ide të definuar, kur të kem do filloj të krijoj me dëshirën më të madhe. Ideja është që shqiptarët nuk kanë nevojë për aplikacione njoftimi,dashurie ose të tjera të atyre llojeve, ne kemi nevojë për nje aplikacion që do të na bashkojë të mësojmë dhe të punojmë më shumë për të dashurën Shqipëri dhe ta përfaqësojmë sa më mirë në botë.
