Shoqata e Bashkësisë Shqiptaro- Kanadeze e Torontos, e cila nëntor të këtij viti mbushi 30 vjet nga themelimi i saj, edhe në kushtet e krijuara nga pandemia COVID-19 ka gjetur mënyra atraktive për ta festuar 28 Nëntorin- Ditën Kombëtare Shqiptare dhe përvjetorin e saj të rëndësishëm. Në fillim të muajit nëntor, ka mbledhur grupin e punës me një koktej rasti duke respektuar ligjet në fuqi të Ontarios për parandalimin e pandemisë, dhe para disa ditës ka dalë me një video 15 minutëshe në të cilën aktivistë, diplomatë, udhëheqës dhe bashkëpunëtorë të shoqatës kanë drejtuar mesazhe urimi për përvjetorin e shoqatës. Muaji festiv përfundoi më 29 nëntor me Mbrëmjen e parë Virtuale, e cila u paraqit përmes platformës Zoom, që pati interpretime nga shumë artistë të mirënjohur, brenda dhe jashtë vendit, të cilët ndër vite kanë bashkëpunuar në forma të ndryshme me shoqatën.
Kryetari i SHBSHK z. Bujar Zejnullahu ishte ai që hapi i pari takimin duke theksuar në fjalën e tij se aty ishin mbledhur shumë pjesëmarrës dhe të ftuar që pe e ndiqnin këtë ngjarje direkt anë e mbanë botës, për të festuar 108- vjetorin e shpalljes së Pavarësisë së Shqipërisë dhe ngritjes së Flamurit Kombëtar, Muajin e Trashëgimisë Shqiptare në Ontario, dhe natyrisht edhe 30- vjetorin e themelimit të shoqatës.
Nderonin me perzencën e tyre ambasadori i Republikës së Shqipërisë në Kanada z Ermal Muça, Konsulli i Përgjithshëm i Republikës së Kosovës në Konada z. Donat Syla , dhe ish- deputetja liberale, Laura Albanese që në kohën e kalimit të ligjit për muajin nëntor si Muaji i Trashëgimisë Shqiptare në Ontario shërbente si Ministre e Emigracionit e kësaj krahine, të cilët secili në formën e vet dha mesazhe urimi e bashkëpunimi.
Më pas përshëndetën diva shqiptare, sopranja me famë botërore, Nder i Kombit, Inva Mula, kryetarja e Shoqatës Arbëreshe Lucia Martino, kryetarja e nderit e ShBSHK të Torontos Ruki Kondaj, dhe në fund u recitua një poezi në gjuhën shqipe nga vogëlushja Emma Lazimi.
Me paraqitjet dhe copëzat e tyre artistike nderuan: nga Tirana Myfarete Laze, nga Gjakova këngëtarja Yllka Kuqi dhe Valon Shehu, nga Peja Ylli Demaj, nga Parisi Erza Muçolli, si dhe arrtistët e mirënjohur nga Toronto Jani dhe Sofia Papadhimitri, Tringa Rexhepi, vallëtarja Liliana Cingu, Grupi i Valleve “Shqiponjat e Vogla, të përcjellur gjithmnonë nga Dj Viss, të cilët i kemi parë shpesh nëpër aktivitetet fizike të shoqatës në vitet e fundit.
Gjatë mbrëmjes u prezantua edhe letra përshëndetëse e kryeministrit të Kanadasë z. Justin Trudeau që kishte nisur shoqatës me rastin e 30-vjetorit të themelimit.
“Prej themelimit më 1990, Shoqata e Bashkësisë Shqiptaro- Kanadeze ka qenë e përkushtuar për ndërtimin dhe mbajtjen e një komuniteti vital. Ky moment historik ofron një mundësi të mrekullueshme për të reflektuar mbi historinë e organizatës suaj, për të festuar arritjet e saj të shumta ndër vite dhe për të vënë në pah qëllimet për të ardhmen. Këtë vit, ju shënoni edhe momentin kryesor në historinë tuaj ku 108 vjet më parë Shqipëria shpalli pavarësinë e saj nga Perandoria Osmane. ”- thuhet ndër të tjera në urimin e kryeministrit kanadez Trudeau.
Komuniteti shqiptar përmes shoqatës më të vjetër të tyre ka pranuar urim edhe nga kryetarja e Grupit të Miqësisë Shqipëri- Kanada në Parlamentin e Kanadasë znj. Julie Dabrusin. “Me këtë rast, unë do të doja të vlerësoja kontributet e panumërta të komunitetit shqiptaro- kanadez në Toronto. Uroj që Shoqata e Bashkësisë Shqiptaro- Kanadeze të vazhdojë të promovojë kulturën shqiptare dhe të pasurojë strukturën e shoqërisë sonë multikulturore”- thuhet në urimin e znj. Dabrusin.
Aty u shfaq një dokumentar i shkurtër përgaditur enkas për këtë përvjetor nga TV Pasqyra Shqipare me producent Ilir Lena, i cili ka përcjellur çdo hap të shoqatës së paku në dhjetë vitet e fundit.
Koncerti online u shfaq falë angazhimit të pashoq të Grupit të Punës ngritur kohë më parë nga kryesia e shoqatës në përbërje: Rex Ferati, Oriana Naska, Ruki Kondaj, Amarda Selimi, Vlora Rrustemi dhe Irene Breznica.
Të pranishmit u ndanë me shpresën se ia kishin arritur qëllimit duke mos e lejuar pandeminë COVID-19 të anulonte festën tradicionale kombëtare të 28 Nëntorit dhe përvjetorin e 30-të të Shoqatës së Bashkësisë Shqiptaro- Kanadeze të Torontos, gjithnjë në mendje se shumë shpejt do të takoheshin fizikisht.
