Televizioni Kultura Shqiptare në New York ka festuar 23-vjetorin. Ky televizion nisi transmetimin më 28 nëntor 1997 dhe jo rastësisht transmetimi i parë ishte filmi “ Nëntori i dytë”.

Televizioni Kultura Shqiptare New York, që u themelua nga familja Belliu ka ndjekur sistematikisht jetën dinamike të komunitetit shqiptaro-amerikan ku ngjarjet, protagonistët dhe efektet e këtyre transmetimeve kanë qenë të shumta.

Themeluesit e këtij televizioni falenderuan me përzemërsi pjesëmarrësit dhe bashkëpunëtorët e shumtë ndër vite që kanë kontribuar për këtë televizion.

Vitet e fundit “Albanian Culture TV” e ka zgjeruar veprimtarinë e vet në Tiranë e Prishtinë pas suksesit absolut që solli bashkëpunimi shumëvjeçar me televizionin “Pasqyra Shqiptare në Kanada”, “Federata Panshqiptare Vatra”, “Organizata Motrat Qiriazi”, si dhe me shumë individualitete të spikatura të jetës sociale dhe kulturore në New York duke u shndërruar në këtë mënyrë në një dritare komunikimi e rrezatimi me anët e ndritshme që na falin sadopak dritë në kohë dritëhijesh.

23-vjetori u festua në një ceremoni me pak të pranishëm për të respektuar masat e vendosura për shkak të pandemisë.