Stafi i mësueseve të Qendrës Kulturore Shqiptaro – Amerikane në Riverdale  të New Jersey ka gjetur një mënyrë shumë të bukur për të nxitur nxënësit të mësojnë gjuhën shqipe. Mësuesit çdo javë zgjedhin nxënësen apo nxënësin më të mirë në mësime dhe nxënësit të dalluar si shpërblim i jepet flamuri kombëtar me shqiponjën dykrenare.

Mësimi po zhvillohet në kushtet e vështira të pandemisë, por dëshira e nxënësve nuk mungon. Të gjithë aktivitetet e nxënësve shënohen në një tabelë, e cila gjendet në korridorin e shkollës. Në shkollën e “Qendrës Kulturore Shqiptaro – Amerikane” veprojnë disa grupe si grupi i recituesve, grupi i këngëtarëve, grupi i piktorëve, grupi i sportistëve etj.

Mësueset e Qendrës Lindita Shahinaj, Valdete Cenalia, Blerina Karriqi , Vjollca Myrtaj dhe Arta Dauti kanë gjetur këtë formë për t’ i motivuar nxënësit për të mësuar gjuhën shqipe.

Flamurin kombëtar nxënësi e mban te banka e tij gjersa përfundon mësimi. Në këtë mënyrë nxënësve iu shtohet dashuria që në moshë të vogël për flamurin, simbolin tonë kombëtar.