Kjo periudhë përkon edhe me punët sezonale dhe vjeljen e të mirave të vjeshtës dhe në Greqi për shkak të koronavirusit ka mungesë të theksuar punëtorësh.

Mandarinat dhe ullinjtë e grekëve janë ende në pemë, teksa ata kërkojnë më shumë punonjës sezonalë nga Shqipëria, duke i kërkuar autoriteteve që të hapin doganat me vendin tonë.

Mediat greke raportojnë se vetëm në Thesproti janë mbjellë 10 mijë hektarë mandarina, ndërsa ullinjtë e Kretës dhe zonave të tjera duhen vjelë me urgjencë.

Përmes një letre për ministrin e Mbrojtjes Civile, Nikos Hardalias tre kryebashkiakë grek i kërkojnë të marrë masa. “Me situatën që po kalojmë për shkak të koronavirusit, ne po sigurojmë punonjës me pagë të ulët nga Afrika, që janë të ligjshëm dhe me zell të madh për punë, por komuniteti lokal është i shqetësuar, pasi shumica e punëtorëve afrikanë dhe pakistanezë nuk i nënshtrohen testeve për koronavirus, ndërsa masat individuale të mbrojtjes për përhapjen e virusit nuk respektohen me besnikëri”, thuhet në letrën e tyre.