Earla Alimehmeti është e vetmja konsulente biznesi shqiptare e certifikuar në Romë e regjistruar në Urdhrin e Konsulentëve të Biznesit të Italisë dhe pjesë e ADCAI, shoqatës shqiptare të sapo krijuar.
Earla ka mbërritur në Romë në 2003 dhe është diplomuar për Shkenca Ekonomike të Biznesit për administrimin e Vlerësimin e Kompanive. Prej 2008 ka bashkëpunuar me një studio të rëndësishme konsulence biznesi dhe këshillimi financiar ndërkohë që merrte titullin Konsulente biznesi e Certifikuar, auditor ligjor dhe menaxheri i krizave. Në 2019 hapi zyrën e saj në Romë.
Ju jeni e vetmja konsulente biznesi me origjinë shqiptare e regjistruar në Urdhrin e Konsulentëve të Biznesit të Romës. Vërejmë një rënie të numrit të konsulentëve të biznesit me origjinë shqiptare në Itali. Si e shpjegoni?
Është e vërtetë, mendoj se numri i reduktuar ndodh për shkak të njohjes së pakët të figurës profesionale të konsulentit të biznesit në vendin tonë. Ju kujtoj se iniciativa sipërmarrëse private në vendin tonë u zhvillua pas viteve ’90, për më tepër që dhe figura e konsulentit në vendin tonë është ende pak e njohur. Një tjetër aspekt mund të jetë edhe fakti i një rrugëtimi të gjatë dhe pas studimeve mes praktikave profesionale dhe provimeve të shtetit që jo të gjithë e ndërmarrin lehtësisht këtë rrugëtim profesional.
Me shumë kënaqësi theksoj një shumicë femërore në shoqatën tuaj. Një rastësi është kjo?
Le të themi se ky vëzhgim i juaji shkon kundër numrit kombëtar ku Italia ka një dominim mashkullor për këtë figurë profesionale. Mendoj se më shumë se rastësia shumë shpesh në vendin tonë origjina e figurës së një konsulenti biznesi është më e lidhur me botën femërore edhe pse së fundmi dhe në Shqipëri kjo tendencë po zvogëlohet.
Keni një eksperiencë prej më shumë se 10 vitesh në këtë punë. A keni klientë shqiptarë dhe cilat janë veçoritë e tyre?
Po, mos klientëve të mi ka dhe qytetarë shqiptarë apo origjinë shqiptare. Në dhjetëvjeçarin e fundit shoh me kënaqësi se veç figurës së ndërtuesit, artizanit, bizneseve të vogla etj., ka nisur të ketë një dominim të profesionistëve me origjinë shqiptare dhe ky është rezultat i një vale të madhe studentësh shqiptar në fillim të viteve 2000 që kanë studiuar në universitete të ndryshme italiane.
Jemi në një situatë të vështirë sociale dhe ekonomike për vendin. Cilat janë problematikat më të mëdha të klientëve tuaj në këtë moment dhe këshillat që mund të jepni për bashkatdhetarët tanë në vështirësi?
Në këtë moment vështirësitë janë të shumta, vështirësitë më të mëdha janë ato të të pasurit akses në kredi për të përballuar kostot e kësaj periudhe, shumë gjenden në vështirësi pasi fondi kompensues po vonon, interpretimet e ndryshme të dekretit të kryeministrit që jo gjithmonë janë të qarta. Këshilla është ti besojnë një profesionisti, pra një konsulenti biznesi të certifikuar për të zgjidhur në mënyrë më të mirë të mundshme dhe të shpejtë problematika të ndryshme që po përballojmë sidomos në këto momente.
