Arjena Duci, fashion-blogerja e njohur shqiptare që jeton në Izmir të Turqisë ka rrëfyer momentet e tmerrit të tërmetit të fuqishëm që preku mesditën e sotme Turqinë dhe Greqinë.
“Ne ishim në punë kur ndodhi, jemi rreth 15 veta në zyrë. Fatmirësisht situatën e menaxhuam me qetësi në ato momente. Po i flisnim njëri-tjetri duke i dhënë kurajo dhe sapo mbaroi, dolëm direkt. Pastaj nga shoku e tronditja pati të qara normal. Frikë dhe mërzi e madhe se shikojmë vetëm ambulanca, zjarrfikëse, polici, njerëz duke folur në telefon e duke qarë”, rrëfen Arjena momentet e tmerrit.
Për fat të keq për Arjenën ky është tërmeti i dytë i këtyre përmasave që përjeton. Pothuajse një vit më parë ajo ka qenë në Shqipëri kur Shqipëria u godit nga tërmeti i 26 nëntorit 2019, me magnitudë 6.4. “Mua mu kthyen edhe ato kujtimet e Shqipërisë dhe tmerreve që kaluam dhe jam ende e tronditur. Por me shpresë dhe kurajo! Vetëm kështu kalojnë këto gjëra.”, thotë fashion-blogerja shqiptare.
