Ka realizuar mbledhjen e tij të parë komisioni i veçantë për vlerësimin e rezultateve të studentëve, të cilët studiojnë jashtë vendit, dhe shtetasve të huaj me origjinë shqiptare, të cilët përfitojnë bursa studimi nga Republika e Shqipërisë . Gjatë takimit online anëtarët u informuan për rolin e tyre për fillimin e punës dhe koordinimin e institucioneve përgjegjëse për krijimin e një baze të të dhënave shtetërore për të gjithë studentët shqiptarë jashtë vendit si dhe të shtetasve të huaj me origjinë shqiptare të cilët përfitojnë bursa studimi nga Republika e Shqipërisë, sipas Vendimit Nr. 504, datë. 24.6.2020, të Këshillit të Ministrave.
Ky grup pune kryesohet nga Ministri i Shtetit për Diasporën, z. Pandeli Majko dhe në përbërje ka zëvendësministrat dhe Sekretarët e Përgjithshëm në Ministrinë e Arsimit, Sportit dhe Rinisë dhe Ministrinë për Evropën dhe Punët e Jashtme, Drejtorinë e Agjencisë Kombëtare të Diasporës, Drejtorinë e Drejtorisë së Përgjithshme të Politikave dhe Zhvillimit të Arsimit, Sportit dhe Rinisë në Ministrinë e Arsimit, Sportit dhe Rinisë, Drejtorinë e Drejtorisë së Përgjithshme të Çështjeve Politike dhe Strategjike dhe Drejtorinë e Drejtorisë së Çështjeve Konsullore në Ministrinë për Evropën dhe Punët e Jashtme.
Rezultati i punës së këtij komisioni do të jetë krijimin e bazës të të dhënave shtetërore të studentëve, të cilët studiojnë jashtë vendit, dhe shtetasve të huaj me origjinë shqiptare, të cilët përfitojnë bursa studimi nga Republika e Shqipërisë. Ky regjistër të dhënash do të përmbajë të dhëna personale për shtetasit shqiptarë, të cilët kryejnë studimet universitare jashtë vendit; shtetasit e huaj me origjinë shqiptare, të cilët janë përfitues të programeve të financuara nga Republika e Shqipërisë si dhe shtetasit shqiptarë, të cilët kanë përfituar bursat e studimit të cilat i ofrohen Shqipërisë nga shtete nga organizata ndërkombëtare dhe jofitimprurëse në bazë të marrëveshjeve të nënshkruara apo dokumente të tjera ku Republika e Shqipërisë është palë.
