Sezoni i ri futbollistik e gjen të angazhuar skuadrën e Horës së Arbëreshëve, komuna më e madhe e banuar nga arbëreshët në Italinë e Jugut. Sot kryetari i kësaj komune Rosario Petta i uron suksese skuadrës San Giorgio Piana, e cila luan për kategorinë e parë. Më poshtë i referohet edhe faqes zyrtare të skuadrës, ku është shpallur edhe organigrama drejtuese, në krye të së cilës është Evis Troka, me origjinë shqiptare gjithashtu. Më parë Troka ka dhënë një intervistë për shkrimtarin nga Hora, Mario Caliva, e cila është publikuar në shtator të këtij vitit.

Troka kishte theksuar se në kohën e pandemisë përveç vështirësive që ka sjellë izolimi dhe mospatja mundësi e trajnimit në kushte normale, ekipi e ka ndjerë edhe mungesën e tifozëve. I pyetur se sa e vështirë është të ndërmarrë çuarjen përpara të një ekipi të një komuniteti kaq të vogël, ai është përgjigjur se falë bashkëpunëtorëve dhe sakrificave të eikpit, do të përpiqen ta vazhdojnë këtë projekt sportiv të cilin komuniteti i Horës e meriton.

Ky është viti i parë që Troka drejton këtë skuadër dhe në tre vitet e mëparshme ka drejtuar kompaninë e tij të quajtur “Italtop”, e cila ka qenë sponsori i përgjithshëm i skuadrës që sot drejton. Në këtë skuadër 70% e lojtarëve janë arbërëshë dhe vendas, banorë të Horës.