Në vijim të riorganizimit të punës për ti ardhur në ndihmë bashkatdhetarëve ne procesin e pajisjes me dokumenta, Ambasada e Shqipërisë në Athinë ka njoftuar se zyra e shpërndarjes së dokumenteve biometrike në Greqi punon me kohë të plotë çdo ditë në orarin 08:00-16:00.
Ambasada edhe një herë i bën thirrje qytetarëve që të shmangin grumbullimet masive në orët e mëngjesit, pasi shërbimi ofrohet gjatë gjithë orarit zyrtar dhe të gjitha faturat shërbehen në kohë.
Gjithashtu, në njoftim thuhet se brenda kësaj jave do realizohen dërgesat për kërkesat e paraqitura nëpërmjet e-mail për tërheqjen e pasaportës dhe kartës së identitetit me anë të shërbimit postar. Sipas njoftimit shtetasit shqiptarë në Greqi duhet të kontrollojnë e-mailet për të plotësuar të dhënat e mangëta të adresës në rast se kërkohet.
“I bëjmë thirrje komunitetit tonë të tregohet i vëmendshëm për të mos rënë pre e personave manipulues të cilët duke dashur të përfitojnë nga ky shërbim, përdorin praktika abuzive në dëm të tyre. Delegimi i përdorimit të së drejtës tuaj për tërheqjen e dokumenteve tuaj biometrikë me shërbim postar, ju ngarkon me përgjegjësi personale në rast të humbjes ose mosdorëzimit të tyre nga këta persona. Theksojmë se e vetmja tarifë që detyroheni të paguani është ajo e dërgesës postare”, thuhet në njoftim.
Ambasada e Republikës së Shqipërisë në Athinë në këtë nismë të ndërmarrë, synon cilësinë më të lartë të shërbimit.