Mësuesit shqiptarë në Diasporë vazhdojnë punën e tyre për mësimin e gjuhës shqipe. Përveç thirrjeve të herë pas herëshme për më shumë vëmendje ndaj mësimit të gjuhës së vendit të origjinës mësuesit punojnë për të ngritur klasa që u mundësojnë fëmijëve shqiptarë të mësojnë gjuhën shqipe. Në Zvicër mësuesit ndonëse në kushtet e pandemisë kanë qenë të angazhuar në hapjen e pikave të reja për mësimin e gjuhës shqipe. Së fundmi ata kanë hapur një klasë në qytetin Egg, ku si mësuese punon Albulenë Jusufi. Mësimi zhvillohet çdo të martë nga ora 16:00 deri në orën 18:00.
Mësuesja Jusufi është një prej mësueseve më të angazhuara në këtë rajon, pasi ajo jep mësim edhe në shkollat Effretikon, Meilen, Oetwill am See dhe tashmë edhe në Egg. Mësuesit shqiptarë suksesin e klasave të gjuhës shqipe në Zvicër ja atribuojnë bashkëpunimit të ngushtë me prindërit shqiptarë të cilët vazhdojnë të shfaqin interesim për shkollat të cilat po hapen nga Shkolla Shqipe në Zvicër.
Në këto klasa mësimi zhvillohet me tekstet e siguruara falas nga Qendra e Botimeve për Diasporën, Janë 1006 tekste shkollore dhe plotësuese të paracaktuara për mësimdhënien e gjuhës dhe kulturës shqiptare, të dërguara nga Qendra e Botimeve për Diasporën në Zvicër për vitin shkollor 2020-2021.
