Qendra e Botimeve për Diasporën, për të dytin vit radhazi, ka dërguar tekste mësimore në Diasporë, në përmbushje të misionit së saj themelor, atë të pajisjes me tekste mësimore dhe materiale plotësuese të gjuhës e kulturës shqiptare, falas për shkollat e gjuhës shqipe.

Ditën e sotme tekstet shkollore dhe të mësimit plotësues kanë mbërritur në shkollën “Fari i Dijes” në Kretë të Greqisë.

Këtë vit pjesë e paketës së librave të dërguara janë edhe librat më të fundit të botuar nga QBD si botimet Dygjuhëshe ku përfshihen fjalori Shqip-Greqisht dhe Klasikët (seria e përrallave) Dygjuhësh Shqip-Greqisht.

Kreta është qyteti i radhës ku kanë mbërritur tekstet e siguruara falas nga QBD. Gjatë këtyre ditëve mësues të gjuhës shqipe në SHBA, Kanada, Ukrainë, Finlandë Austri, Greqi dhe Zvicër kanë marre në dorëzim tekstet.

Mbi 17 mijë tekste shkollore dhe plotësuese do të mbërrijnë brenda muajit shtator te nxënësit dhe mësuesit e shkollave të gjuhës dhe kulturës shqiptare të 22 vendeve të botës, për vitin 2020-2021.