Qeveria italiane në mbledhjen e radhës ka vendosur të lehtësojë disa nga masat e marra për shkak të pandemisë Covid-19.

Në një njoftim të Ambasadës italiane në Shqipëri bëhet e ditur se Këshilli Italian i Ministrave ka marrë vendimin për lejimin e bashkimit për çiftet ndërkombëtare, edhe kur ato nuk janë bashkëjetuese. Vendim, nga i cili përfitojnë edhe çiftet shqiptare, të cilat për shkak të mbylljes së menjëhershme të kufijve mbetën të ndarë në vende të ndryshme.

Në njoftim theksohet se lejohet bashkimi për çiftet ndërkombëtare, edhe jo bashkëjetuese, nëse ekziston një marrëdhënie afektive e provuar dhe e qëndrueshme, arsye për të cilën shtetasit shqiptarë që kanë një marrëdhënie të qëndrueshme afektive me një shtetas/e italian/e (ose shqiptar/e me vendbanim në Itali) do të mund të hyjnë në Itali për t’u bashkuar me ta.

Njoftimi i plotë i ambasadës:

Me Vendim të Kryetarit të Këshillit të Ministrave të datës 7 shtator 2020 (kliko këtu për tekstin dhe këtu për dokumentet bashkëlidhur), masat në fuqi për parandalimin e infeksionit në të gjithë territorin kombëtar të parashikuara nga Vendimi i Kryetarit të Këshillit të Ministrave i datës 7 gusht 2020 si edhe dispozitat e parashikuara nga urdhrat e Ministrit të Shëndetësisë të datës 12 gusht dhe 16 gusht 2020, janë shtyrë deri më 7 tetor të vitit 2020.
Lutemi të kushtohet vëmendje e veçantë mbi çështjet në vijim:
– Lejohet bashkimi për çiftet ndërkombëtare, edhe jo bashkëjetuese, nëse ekziston një marrëdhënie afektive e provuar dhe e qëndrueshme, arsye për të cilën shtetasit shqiptarë që kanë një marrëdhënie të qëndrueshme afektive me një shtetas/e italian/e (ose shqiptar/e me vendbanim në Itali) do të mund të hyjnë në Itali për t’u bashkuar me ta;
– Hiqet ndalimi i hyrjes apo kalimit tranzit në territorin italian për personelin e policisë së Shtetit;
– Dokumenti C bashkëlidhur Vendimit përditëson në tërësi informacionin mbi kufizimet e aplikueshme në udhëtimet nga dhe për në territoret përtej detit.