Nënkryetari i Rajonit të Kalabrisë, Nino Spirli ka thënë në mbledhjen e fundit të COREMIL (Komiteti Rajonal i Pakicave Gjuhësore) se gjuha arbëreshe duhet mbrojtur, ashtu si edhe gjuhët tjera të pakicave etnike. Në një shkrim të botuar ditën e sotme në quotidiano.net Spirli ka thënë se: “Identitetet janë një thesar i vërtetë dhe trashëgimi kulturore”.

“COREMIL përfaqëson një nga “mjetet e rëndësishme për mbrojtjen dhe promovimin e shumësisë së identiteteve gjuhësore dhe kulturore të rajonit tonë – deklaroi Spirlì – dhe në këtë kontekst, identitetet përbëjnë një thesar të vërtetë dhe trashëgimi kulturore”.

Nënkryetari shtoi se politika duhet të luajë rol në mënyrë që çështja e pakicave gjuhësore të mos mbetet në harresë, për të mbrojtur identitetet dhe për të ruajtur dhe rritur numrin e njerëzve që flasin arbërisht dhe gjuhët tjera.

“Ky komitet – tha Spirlì – do të punojë për t’i dhënë më në fund një pikë kthese vendimtare këtij projekti të rëndësishëm, duke përdorur aftësitë dhe profesionalizmin e duhur, për të dhënë përgjigjet që banorët e këtij territori kanë pritur për shumë gjatë”.

Takimi u ndoq gjithashtu nga Sonia Talarico, Drejtore e përgjithshme i sektorit të Aktiviteteve Arsimore dhe Kulturore dhe Maria Antonella Cauteruccio, Drejtore e sektorit të kulturës, muzeve, bibliotekave, arkivave dhe pakicave gjuhësore. DiasporaShqiptare