Katër filma, të katër prej regjisorëve shqiptarë janë vlerësuar lart nga juria e Festivalit të Filmit “New York True Venture Film Festival – NYTVFF” dhe janë nominuar në kategori si: montazhi, të drejtat e njeriut, filmi eksperimental, fëmija aktor, romanca, regjia më e mirë etj.
Filmat dhe regjisorët e vlerësuar më lart nga juria dhe të nominuar janë: “Rruga” me regji të Besim Ugzmajlit; “Lugatka” me regji nga Altin Sulaj; “Një Dashuri” nga regjizori Viron Roboci si dhe “Vula” e regjizorit Valmir Tertini.
Për shkak të Pandemisë globale, në 6 Shtator në orën 15:00 do shfaqen në faqen e festivalit në Facebook (New York True Venture Film Festival) videot prezantuese të filmave të nominuar dhe do të përgëzohen artistët që kanë fituar çmime në kategoritë përkatëse.
Anëtarët e jurisë
Juria e “New York True Venture Film Festival” ka bërë vlerësimin e filmave të ndarë nga tre filma në 24 kategori. Puna e jurisë ka qenë voluminoze dhe transparente, ndërsa një pjesë e filmave kanë një diferencë shumë të ngushtë pikësh mes tyre. Dhjetë anëtarët e jurisë janë profesionistë të suksesshëm në fushat e tyre respektive të artit. Tre prej tyre janë me origjinë Shqiptare:
Gjilberta Lucaj Cohen është një profesioniste e muzikës dhe mësuese e violincelit si dhe një aktore e talentuar.
Adriatik Berdaku është drejtor fotografie me shumë çmime dhe me një eksperiencë 25 vjeçare në këtë fushë, një pjesë të së cilës në radiotelevizionin Italian.
Georgios Beno s’ka 2 vjet që ka mbaruar “St. John’s University” për Film dhe Televizion dhe ka punuar në disa filma dhe seriale, ndërsa ka asistuar dhe mjeshtrin e njohur të fotografisë zotin Fadil Berisha. Përsa i përket pjesës Amerikane të jurisë, ata janë gjithashtu profesionistë të shquar në fushat e tyre.
Alexa Servodidio është një aktore, prezantuese në radio, psikiatre, dhe autore librash.
Joe Wooley është një aktor profesionist i cili shërben në Shtetin e New York_ut dhe Komitetin Kombetar të SAG-AFTRA (Screen Actors Guild – American Federation of Television & Radio Artists).
Josh Shull është skenarist, producent, dhe menaxher i vendeve të xhirimit i cili ka punuar për kompani të mirënjohura produksioni si: Viacom Media Network, VH1, HBO, NBC studios etj.
Mardig Bidanian është anëtar i bordit drejtues të “Montreal International Wreath Award Film Festival” (MIWAFF)që prej vitit 2015 dhe anëtar jurie që prej vitit 2017, si dhe asistent në produksion filmi.
Wilhelm Lewis është një aktor dhe model që është shfaqur në filma përkrah aktorëve të njohur si Queen Latifa, Denzel Washington, Alan Kingetj.
Vanessa King është producente dhe profesoreshë skenaresh në New York dhe Londër. Ajo ka fituar disa çmime duke perfshirë AMPAS/Oscar’s Nicholl Screenwriting Fellowship dhe Sony Worldwide Entertainment’s Emerging Filmmaker Program (TV Series), ndërsa prej shumë vitesh është asistentja e aktores së njohur Julianne Moore.
Jon Russell Cring është regjizor dhe producent me 13 çmime nga festivale të akredituara në IMDB (Internet Movie Data-Base). Ai ka qenë regjizori dhe producenti i qindra projekteve vetëm në 10 vitet e fundit.
Edicioni i parë i “New York True Venture Film Festival”
Më 6 shtator në orën 15.00 live në faqen e FB të New York True Venture Film Festival do të bëhet edhe ndarja e çmimeve. Në NYTVFF u konkurua në disa zhanre si film me metrazh të shkurtër, të gjatë, dokumentarë, video muzikore etj dhe prurjet kanë qenë të shumta në numër dhe realizime të shkëlqyera. Dokumentari i prezantuar nuk është vetëm historik, biografik, ose që kanë të bëjnë me një temë të caktuar por vijnë disa dokumentarë me tematikë natyrën dhe burimet nënujore saqë mrekullia e kameras të përdorur nën ujë, vërtet të magjeps e të lë pa frymë.
Festivali i filmit një markë shqiptare
Ky është një festival që bëhet nga shqiptarët, pasi vetë organizatorët janë shqiptarë dhe pjesë e jurisë janë shqiptarë ndaj në thelb ky festival është një ngjarje shqiptare. Sa më shumë aktivitete të ketë shqiptare, sa më të mirëorganizuar të jenë shqiptarët aq më mirë e më fort nxjerrim në dritë vlerat tona si popull. Sa më të shumë organizatat,sa më shumë biznese, sa më shumë aktivitete artistike, aq më shumë identitet dhe pasuri kombëtare. Dielli
