Shërbimi i Aviacionit Civil të Greqisë ka shpallur udhëzimet e reja (notam) për ndalimin e përhapjes së Covid-19, me afat 31 gushtin.

Deri në mesnatën e 31 gusht 2020 shtyhet vendimi për fluturimet vetëm drejt aeroportit të Athinës “Eleftherios Venizelos” nga aeroportet e Shqipërisë dhe Maqedonisë së Veriut.

Shtyhet vendimi për ndalimin e qarkullimit të shtetasve të vendeve të treta, përfshi Shqipërinë, përveç disponuesve të lejeve të qëndrimit, apo të dokumentave të tjera që lejojnë qëndrimin në vend.

Në çdo rast, shtetasit e vendeve të treta që duan të udhëtojnë në aeroportin e Athinës për arsye madhore, duhet të kontaktojnë me konsullatat e Greqisë në vendin përkatës.

Pasagjerët nga Shqipëria, Maqedonia e Veriut, Bullgaria, Rumania, Suedia, Hollanda, Belgjika, Spanja, Malta, Emiratet e Bashkuara, Çekia do të paraqesin në kompaninë ajrore, para fluturimit, test molekular negativ, të 72 orëve të fundit, nga një qendër mjekësore e certifikuar, në gjuhën angleze, me të dhënat e pasaportës.

Kontrolli i testit negativ është i detyrueshëm nga kompania ajrore, që nuk duhet të lejojë fluturimin e pasagjerit të papajisur, në rast të kundër gjatë kontrollit në aeroportin e Athinës, kompania përkatëse do të detyrohet të sigurojë riatdhesimin e menjëhershëm të pasagjerit.

Mbetet në fuqi plotësimi i formularit Passenger Locator Form, në faqen e qeverisë greke, për të gjithë udhëtarët.

Deri në 31 gusht 2020 ndalohen fluturimet Turqi-Greqi.