Në mbledhjen e zgjatur të natës së djeshme mes përfaqësive të përhershme të BE-së u përcaktua lista e vendeve të treta të sigurta në parim për të hapur kufijtë e vendeve anëtare nga data 1 korrik.
Në mbledhjen e djeshme, Shqipëria dhe Maqedonia e Veriut nuk u përfshinë në listën e 14 vendeve të sigurta, sipas të dhënave epidemiologjike.
Ndërsa do të lejohen udhëtarë nga Serbia, Australia, Kanada, Japoni, Korea e Jugut, akoma dhe nga vende të Afrikës Veriore, si Maroku, Tunizia dhe Algjeria si dhe Kina, me kushte të rrepta. Përveç Shqipërisë, jashtë listës janë edhe Turqia, Rusia, SHBA, Brazili, Suedia etj.
Gjatë mbledhjes që ka zgjatur 6 orë, u diskutua gjatë duke u vënë re një hezitim i përgjithshëm për rihapjen e kufijve nga shumica e vendeve, kryesisht Italia e Danimarka. Procedura parashikon informimin me shkrim të qeverive përkatëse të vendeve anëtare të BE dhe nga dita e hënë publikim të listës së vendeve, me të cilat hapet kufiri nga 1 korrik.
Nga dita e hënë pritet dhe vendimi i ri zyrtar për hapjen e kufijve me Shqipërinë, që sipas të dhënave të fundit, nuk pritet të jetë data 1 korrik, por do të marrë shtyrje të re, deri në një rishqyrtim të shifrës së të infektuarëve apo të dhënave epidemiologjike.
