Piktori shqiptar nga Kosova, Gazmend Freitag, i cili jeton dhe operon prej 16 vitesh në Linzi të Austrisë, ka sjellë veprën e tij më të fundit duke u frymëzuar nga pandemia Covid-19. Ai e cilëson autoportretin si “sozi” me të cilin kaloi javët e karantinës.

Në një intervistë të shkurtër  me shkrimtaren austriake Monika Grill, Freitag  ndalet gjatë tek kjo vepër në të cilën mbizotërojnë ngjyrat e forta dhe plot jetë.

Sapo keni përfunduar autoportretin tuaj të ri. Si të gjithë njerëzit, ju është dashur të ndiqni rregulloret e karantinës. Si ishte për ju, i vetëm në studio, pa mundësinë për të parë miqtë tuaj?

Kjo nuk është asgjë e re për mua. Unë gjithmonë pikturoj dhe e bëj vetëm. Por me siguri se ndjehem pak i vetmuar, sepse më pëlqen të takoj miq për një gotë verë të kuqe në mbrëmje.

E mbaj mend autoportretin tuaj nga viti 2014. Çfarë ka ndryshuar për ju që nga ajo kohë?

Stili im është bërë më realist, më figurativ dhe gjithashtu më dramatik. Ngjyrat janë më të forta. Unë jam më i guximshëm. Për të qenë i sinqertë, më pëlqen shumë më mirë piktura e re. Dhe unë e ndjej saktësisht mënyrën sesi shikoj në të.

A ndjeheni më i moshuar?

Jo, aspak. Por pamja ime tani është orientuar shumë më tepër për të ardhmen. Të kaluarën e kam përpunuar në mënyrë të pikturuar. Tani jam kurioz për atë që do të vijë.

Tani pyetja ime për sozinë tuaj: A e keni mbajtur distancën e caktuar dhe nuk keni infektuar njëri-tjetrin?

Ne jemi sjellur në mënyrë shembullore. Dhe u infektuam vetëm me entuziazëm dhe me shumë kolorite ngjyrash.