Ka dalë në tregun muzikor kënga “Hard to kiss you” me tekst të poetes së njohur shqiptare Irma Kurti dhe muzikë të kompozitorit italian Galliano Borsato.
“Hard to kiss you” , nën interpretimin e këngëtares Nicole, ka tërhequr menjëherë vëmendjen e publikut.
Me zërin e fuqishëm dhe më një timbër të veçantë, plot muzikalitet, Nicole ka arritur ta përçojë këngën tek mijëra shikues. “Hard to kiss you” është regjistruar, miksuar dhe masterizuar pranë Newsin Studio në Venecia të Italisë, si dhe është hedhur në tregun ndërkombëtar nga shtëpia diskografike italiane Jaywork Records.
Lindur në 20 mars të 1966 në Tiranë, Irma Kurti nisi të shkruajë poezi në moshë të vogël. Ajo njihet nga publiku i gjerë si krijuese e talentuar e teksteve të këngëve të lehta. Është pjesëmarrëse në anketa muzikore, festivale kombëtare e koncerte përpara dhe pas viteve ‘90-të. Shumë prej këngëve me tekstet e saj janë nderuar me çmime dhe poezitë e tyre kanë mbetur ende nëmemorien e dashamirësve të muzikës së lehtë. Ka shkruar rreth njëqind tekste këngësh.
Poetja shkroi lirika të suksesshme që në bankat e Universitetit. Përmendim: “Urimi yt”, “Mbrëmja që mban dashurinë time”, “Pranë të kaltrit det”, “Letër malli”, “Një çast në kujtesën tënde”, etj. Irma Kurti ka fituar 50 çmime dhe vlerësime të ndryshme në konkurse ndërkombëtare letrare në Itali, ku jeton prej vitesh, në Zvicër e më gjerë.
Këngën mund ta shikoni, këtu:
