Pianisti Dr. Redi Llupa, tashmë ambasador i muzikës klasike shqiptare në SHBA, ka ndërmarrë nismën “Unë luaj shqip”, me anë të së cilës synon të promovojë ndërkombtarisht krijimtarinë muzikore të kompozitorëve shqiptarë në Shqipëri dhe diasporë. “Unë luaj shqip” vjen si iniciativë në vazhdën e përkushtimit të tij ndaj muzikës klasike shqiptare duke vepruar si rrjet bashkëpunimi dhe promovimi në mbështetje të zhvillimit të karrierës akademike dhe artistike së artistëve shqiptarë.

Dr. Llupa është pjesë e kërkuesve të rinj shkencorë të diasporës shqiptare dhe artist i përkushtuar ndaj muzikës klasike shqiptare, synon që artistët dhe akademikët e huaj të njohin muzikën e vendit të tij, duke e studiuar imtësisht dhe duke e mbajtur për të barabartë si të gjithë repertorët botërorë klasikë. Ai fuqimisht beson se muzika e kompozitorëve shqiptarë është jo vetëm pasuri e vendit, por edhe një pasuri dhe një pjesë e rëndësishme e muzikës botërore.

Kjo nismë është bërë e ditur nga një postim në rrjetin social Facebook nga Akademia e të rinjve e cila fton të gjithë muzikantët shqiptar dhe të huaj , brenda dhe jashtë vendit të përfaqësojnë nismën.