Konsullata e Përgjithshme në Selanik ka njoftuar se duke filluar nga dita e hënë, datë 11 maj 2020, do të nisë një hapje graduale për takimet për Pasaporta dhe Karta ID. Për të përballuar takimet e prapambetura, por edhe takimet e reja, të krijuara për shkak të COVID-19, konsullata njofton se do të qëndrojë e hapur për gjatë gjithë javës. Orari i pritjes për periudhën 11 maj deri 30 qershor do të jetë nga e hëna në të premte ora 08.00 deri 18.00, ditën e shtunë ​​ora 9.00 deri në orën 16.00 dhe ditën e diel ora 9.00 deri në orën 14.00.
Takimet gjatë fundjavës do të ofrohen kryesisht për shtetasit që iu ka përfunduar vlefshmëria e Pasaportës dhe Kartës ID, shtetasve të moshuar, fëmijëve deri në moshën 15 vjeç, shtetasve që ju ka humbur/vjedhur dokumentet si dhe për tërheqjen e Pasaportave dhe Kartave ID.

Konsullata sjell në vëmendje se të gjitha këto procedura do të kryen duke respektuar masat dhe kufizimet që janë në fuqi në shtetin grek.

“Lutemi dhe kërkojmë korrektësinë maksimale gjatë paraqitjes në Konsullatë duke mos krijuar konfuzion dhe duke respektuar rregullat e përcaktuara: Të keni bërë aplikimin online, të bëni paraprakisht pagesën në Bankën Ethniki, të siguroni Lejen e lëvizjes nga Vendbanimi në Konsullatë dhe kthim, të merrni masa mbrojtëse gjatë rrugës dhe në Konsullatë-Maska dhe doreza, të paraqiteni fiks në orarin e përcaktuar si dhe të ruani distancën dhe mos krijoni konfuzion”, thuhet në njoftimin e ambasadës.