Australia është gati për rihapje. Ka qenë kryeministri australian, Scott Morrison, i cili ka bërë të ditur se si do të rihapet vendi duke filluar këtë fundjavës, pas masave të vëna me qëllim të luftimit të koronavirusit të ri.

Sipas tij, hapja do të realizohet në tre faza, duke nisur që sot me fazën e parë, në të cilën përfshihet: lejimi i pesë mysafirëve në shtëpi, dhe grumbullimi i 10 njerëzve në ambiente të jashtme, hapja e restoranteve, kafeterive dhe dyqaneve, klasat dhe hapësirat për argëtim për fëmijë do të rihapen. Gjithashtu ai tha se do të rikthehet udhëtimi i brendshëm si dhe do të vazhdojë puna nga shtëpia, kjo  nëse iu përshtatet punëtorëve.

Në fazën e dytë do të përfshihen grumbullimi i më shumë se 20 personave, dhe rihapja e kinemave, palestrave, salloneve të bukurisë.

Faza e tretë ndërkaq parasheh grumbullimin e 100 personave.

Vendosja e masave shtrënguese për shkak të COVID-19, këtë vit pezulloi edhe realizmin e festivalit më të madh shqiptar në Australi “Shepparton Albanian Harvest Festival” i cili do të zhvillohej në muajin mars.

“Shepparton Albanian Harvest Festival” është manifestimi më i madh i kulturës shqiptare në Australi, i cili përfshin një sërë aktivitetesh si  muzikë dhe vallëzim tradicional shqiptar, si dhe panairin e kulinarisë shqiptare.

Për sa i takon grumbullimeve masive kryeministri tha se marrja e këtyre vendimeve do të varet nga shteti në shtet, varësisht prej masave që kanë në fuqi për mbajtje të distancës fizike. Kuinsllend dhe Territori Verior tashmë kanë nisur të praktikojnë disa prej masave të përmendura.

“Do të ketë shpërthime, do të ketë raste të reja. Jo gjithçka do të shkojë sipas planit”, ka thënë Morrison, duke shtuar se “Ne nuk mund të lejojmë që frika e kthimit e kthimit mbrapa të na bllokojë të ecim përpara”.