Remzi Mulla është 83 vjeç. Ai emigroi që në moshë të vogël në Australi ku dhe ka kaluar gjithë jetën e tij. Familja e tij u largua nga Shqipëria në vitin 1939 dhe u vendos në Marebba, në North Queensland. Remziu u rrit në një familje që ruajti kulturën dhe traditën shqiptare.
Ai rrëfen për jetën e tij, shkollimin, punën e parë si veteriner, për jetën si kultivues duhani e deri te mbyllja e kësaj industrie në Queensland. Remziu flet për emigracionin si dhe për kontributin që ka dhënë komuniteti shqiptar, në Australi.
Prindërit e tij i përkisnin valës së parë të shqiptarëve që emigruan në Australi. Fillimisht emigroi babi më 1927. Sipas 83-vjeçarit, në atë kohë shqiptarët e nisën rrugëtimin e largët të ndihuar nga anglezët, të cilët i pajisën prej me dokumenta. Pasi kishte punuar për dy vite si druvar dhe si mbledhës pambuku, babi i Remziut dëgjoi se qeveria e Queenslandit do hapte industrinë e pambukut, kështu që bleu një copë tokë edhe e mbolli. “Atëherë babi ishte 19 vjeç. Në vitin 1935 u kthye në Shqipëri dhe u martua me nënën time. Pastaj unë me nënën, një xhaxha dhe ca kushurinj arritëm 19 shkurt 1939” – rrëfen ai. Ka qenë vetëm dy vjec kur mbërriti aty.
Remziu tregon se shqiptarët punonin në ferma, dikush bleu ferma, por gjithmonë ata mblidheshin dhe festonin sipas traditës shqiptare. Gjuha e ndante komunitetin shqiptar nga vendasit dhe shpesh herë martesat mes tyre nuk rezultonin te suksesshme. Ai u martua me një shqiptare që jetonte në Shepparton, por nuk u largua nga Queensland.
Pas vendosjes së komunizimit edhe komunikimi me Shqipërinë u vështirësua. Familja Mulla bëri gosti kur mori letrën e parë nga Shqipëria pas luftës.
Për 14 vjet Remziu punoi si veteriner duke kontrolluar cilësinë e mishit dhe më pas në fermën e tij të pambukut.
Edhe pse ka jetuar mbi 80 vjet në Australi thotë se ka lexuar shumë libra për Shqiprinë e se e ndien veten më shumë shqiptar se Australian. “Tani, këtu jam rritur, këtu kam bërë ushtrinë, këtu kam punuar për qeverinë, por ende zemra më thotë se jam shqiptar” -rrëfen plot emocion Remziu që orgjinën e ka nga fshati Baban, në zonën e Bilishtit. Ndjen keqardhje që shumica e shqiptarëve po e harrojnë gjuhën shqipe. Edhe pse vet nuk e ka vizituar Shqipërinë që kur u largua, që fëmijë, e flet shumë mire shqipen. Madje tregon se po planifikon që ta vizitojë atdheun e tij, ndërsa gruaja dhe fëmijët kanë shkuar disa herë. Intervistoi Nizami Rexhepi
