Qendra e Studimeve dhe Publikimeve për Arbëreshët nënshkroi sot një memorandum bashkëpunimi me Akademinë e Shkencave të Shqipërisë. Nënshkrimi i këtij Memorandumi u krye nga kryetari i Akademisë së Shkenca të Shqipërisë, prof. Skënder Gjinushi, drejtoresha ekzekutive e QSPA-së, prof. Diana Kastrati si dhe Ministri i Shtetit për Diasporën, z. Pandeli Majko.
Ky Memorandum synon koordinimin e studimeve për kulturën dhe historinë e komunitetit arbëresh, bashkëpunimin ndërinstitucional që parashikon realizimin e studimeve të përbashkëta mbi historinë dhe kulturën e komunitetit arbëresh, organizimin e aktiviteteve studimore si dhe krijimin e grupeve të punës për aplikimin në projekte të përbashkëta.
Pikë me rëndësi është edhe mbështetje e studiuesve të rinj, të cilët do të realizojnë studime dhe publikime për këtë komunitet.
Gjithashtu si pjesë e këtij bashkëpunimi do të jetë edhe përgatitja për shtyp të studimeve të specializuara mbi historinë dhe kulturën arbëreshe si dhe realizimin e aktiviteteve vjetore dhe konferencave shkencore me fokus komunitetin arbëresh sipas kushteve të reja të paraqitura pas pandemisë.
Ndërsa Akademia e Shkencave e Shqipërisë në kuadër të këtij memorandumi do të realizojë ofrimin e ekspertizës me anë të anëtarëve të saj për realizimin e studimeve dhe publikimeve për arbëreshët duke siguruar cilësinë e kërkimit shkencor, koordinimin e kërkimit shkencor dhe përgatitjen e kërkuesve të rinj që janë të angazhuar pranë Qendrës së Studimeve dhe Publikimeve për Arbëreshët si dhe vlerësimin, dokumentimin dhe përcjelljen e trashëgimisë akademike mbi komunitetin arbëresh të veprave të figurave më të spikatura në këtë fushë.
Në kuadër të këtij bashkëpunimi Akademia e Shkencave do ti dhurojë Qendrës së Studimeve për Arbëreshët një kolanë më studime të kryera për komunitetin arbëresh.
Qendra e Studimeve dhe Publikimeve për Arbëreshët, e krijuar së fundmi, është institucioni i parë në historinë e shtetit shqiptar që ka në fokus studimet e specializuara që ngërthejnë gjithë universin kulturor, historik, letrar, sociale dhe antropologjik të komunitetit arbëresh, si një trashëgimi unikale kulturore në mbarë botën.
Memorandumin e plotë mund ta lexoni këtu:
